Kollajdy jasaǵan – Qonysbaı ShEJIMBAI, «EQ»
Kezdesý Májilis depýtaty Nartaı Sársenǵalıevtiń tóraǵalyǵymen ótti. Negizgi nazar tarıfterdiń negizdiligine, olardyń halyqqa áserine jáne baılanys sapasyna aýdaryldy.
Qazirgi tańda eldegi uıaly baılanys naryǵynda nebári úsh operator ǵana jumys isteıdi. Sarapshylar muny básekeniń tómendeýine ákeletin negizgi faktorlardyń biri dep baǵalaıdy. Sonyń saldarynan tarıfterdiń ósýi baıqalady. Máselen, ótken jyly monopolııaǵa qarsy organǵa 1 000-nan astam, al Tutynýshylardyń quqyqtaryn qorǵaý komıtetine 1 700-den astam shaǵym túsken.
«Respublica» partııasynan saılanǵan Májilis depýtaty Nurgúl Taý jıynda birqatar ótkir máseleni kóterdi. Onyń aıtýynsha, keıbir baılanys operatorlary tarıfterdi negizsiz kóterip otyr.
«Taldaý Beeline tarıfteriniń 151%-ǵa óskenin kórsetedi, biraq bul ósimge naqty túsinikteme berilmedi. Ekinshiden, nege bul salaǵa jańa ınvestorlar kelmeıdi? Eger naryq tartymdy bolsa, ınvestısııa salýǵa daıyn kompanııalar tabylar edi. Úshinshiden, nege baılanys sapasy tómen? Internet trafıgi tez taýsylady, sheksiz ınternetke aı saıyn abonement tóleısiń, biraq sońǵy 5-6 kún múldem istemeıdi. Aýyldyq jerdegi jaǵdaı tipti qıyn», dedi depýtat.
Jıyn barysynda depýtattar azamattardan túsetin shaǵymdardyń júıeli túrde sheshilmeı otyrǵanyn atap ótti. Ásirese, ınternet jyldamdyǵynyń turaqsyzdyǵy, qyzmet sapasynyń tómendigi jáne tarıfterdiń negizsiz ósýi qoǵamda alańdaýshylyq týǵyzyp otyr.
Beeline, Tele2 jáne Altel abonenttik aqyny qymbattatynyn málimdedi
Kezdesýdiń basty maqsaty – baılanys operatorlarynyń kommersııalyq múddeleri men azamattardyń sapaly ári qoljetimdi qyzmet alý quqyǵy arasyndaǵy teńgerimdi tabý.
Depýtattar bul baǵyttaǵy jumysty kúsheıtip, naryqtaǵy ashyqtyqty arttyrý jáne naqty tetikter arqyly tarıf saıasatyn retteý qajettigin alǵa tartty.
