Sondaı shaqtardyń arasynda aq peıildi jazýshymen jergilikti oqyrman jurtshylyq júzdesedi. Arasynda ákemniń aǵasy, Turar Rysqulov aýdany Kamenka aýylynda turǵan Shalqar Bektenbaıuly da bar. Ol kórkem eńbek pániniń muǵalimi bolǵanymen de, ádebı, tarıhı kitaptardy tańdaı, talǵaı jınaıtuǵyn. Jambyl ólkesine Ábishteı abyz keletinin bilgen soń, qolyna 1993 jyly Almatydaǵy «Jalyn» baspasynan jaryq kórgen «Han Kene» atty ult-azattyq soǵys týraly tarıhı tolǵamdar, pesa men dastandardyń jınaq kitabyn ustaı barady. Ábekeńniń ýnıversıtettegi uly ustazy áıgili Muhtar Áýezovteı kemeńger kelbeti, buıra tolqyn tárizdi shashy, kesek denesi alystan kóz tartyp turatyn. Shalqar aǵamyz amandasyp: «Ádebıetsúıer oqyrmandaryńyzdyń birimin», degende, jazýshy sálemshiniń qolyndaǵy kitapqa osyndaı qoltańba qaldyrypty: «Ábish Kekilbaev. 2.6.2001» dep qoly qoıylǵan. Eshqandaı sóz jazbasa da, jazýshy aǵanyń kók sııasynan oqyrman inige degen iltıpat pen lebizdiń til jetpes demi seziledi.
Bekjan BEKTENBAI
Jambyl oblysy,
T.Rysqulov aýdany,
Qulan aýyly
