Sýret JI kómegimen jasalǵan
Búginde el aýmaǵynda árbir jańa salynǵan kópqabatty turǵyn úı páter sanynyń jartysyna teń turaqpen qamtý normasymen mindettelgen. Alaıda Arqanyń aqyramashynda dalada kólik qoıýdyń tıimsizdigin eskergen turǵyndar jerasty parkıngterinen oryn alǵandy jón sanaıdy. Al mundaǵy 1 bólmeli páterdiń qunyna telingen turaq baǵalaryn árkimniń qaltasy kótere bermeıdi. Sondyqtan turǵyndar oıyn alańshalaryn jaǵalap, kólikterin kórshi aýlalarǵa da qoıyp ketýge májbúr. Al bul kóp jaǵdaıda ákimshilik quqyqbuzýshylyqqa alyp kelip jatady.
«Qazir aýlalarǵa kirip-shyǵý qıyndap ketti. Ásirese, halyq sany kóp Almatydan basqa qalalarda turǵyn úılerdiń aýlasynda uzaq aıaldap tura almaısyń. Belgilengen ýaqyttan uzaq tursań, turǵyndar tarapynan shaǵym túsip, aıyppul arqalaısyń. Jetkizý qyzmetimen aınalysatyndyqtan mundaı máselege kóp tap bolamyz», deıdi kólik júrgizýshisi Ábdinur О́tepbergen.
Aýlalardaǵy avtoturaq jetispeýshiligi turǵyndar qaýipsizdigine de aıtarlyqtaı áser etip otyr. Bul, ásirese, tótenshe jaǵdaılarda arnaıy tehnıkalardyń jolyn bógep, órtti aýyzdyqtaýda, jedel járdem qyzmetin kórsetýde aıtarlyqtaı qıyndyq týdyrady. Mamandardyń sózinshe, qysyltaıań shaqta munyń ózi birshama ýaqytty alatyn kórinedi.
Astanadaǵy avtoturaqtar tolyǵymen qala menshigine ótti
«Mamandandyrylǵan tehnıka júrgizýshileri turǵyn úı aýlalarynda kóptegen qıyndyqqa tap bolady. Ádette, aýla joly tar bolǵany azdaı, sonymen qatar kóbinese jeńil kólikterge de tolyp turady. Bul jaǵdaıda tek abaılap júrý ǵana mańyzdy emes. Eger adamdardy qutqarý nemese órt sóndirgish zattardy berý úshin baspaldaq usyný qajet bolsa, onda avtosatyny «tabanǵa» ornatý kerek. Al olardyń kólemi 4 metrden asady. Mine, osyndaı kezde tar aýlada oryn tańdaý qıynǵa soǵady», deıdi mamandandyrylǵan órt sóndirý bóliminiń kólik júrgizýshisi Zańǵar Qyrǵyzbaev.
Shekaradaǵy kezek azaıady: О́tkizý beketterinde 200 oryndyq avtoturaqtar salynady
Kópti tolǵandyrǵan másele udaıy kún tártibinen túspeı 2023 jyly Prezıdent nazaryna da ilikken bolatyn. Nátıjesinde jańadan salynǵan úılerdi avtoturaqpen qamtamasyz etý mindeti júkteldi. Degenmen qurylys salasynyń sarapshylary qazirdiń ózinde salynǵan úılerde turaq oryndarynyń saqtalýy ekitalaı deıdi. О́ıtkeni ázirge mundaı standart Astana men Almaty qalalarynda ǵana tolyq saqtalǵan. Olardyń aıtýynsha, qurylys kompanııalarynyń barlyǵy birdeı kólik turaǵyn eleı bermeıdi.
«Elimizde salynatyn úılerdiń basym bóligi ekonom klastaǵy úıler. Bul úıler arnaıy kezekke turyp, memlekettik baǵdarlamamen alynatyn bolǵandyqtan, ony alatyn adamdardyń basym bóligi áleýmettik jaǵdaıy tómen nemese ortasha bolǵandyqtan, qurylys kompanııalary kóp jaǵdaıda aqsha únemdep jatady. Kompanııalar turaq salǵannan góri odan da sol jerge keńse ashyp, ony jalǵa bergendi durys kóredi. Onyń ústine jerasty parkıngteri tek komfort sanattaǵy úılerge salynady», deıdi turǵyn úı naryǵynyń sarapshysy Aqádil Jańabaev.
Sarapshynyń sózinshe, zańnamalyq turǵyda ınvestorlarǵa naqty mindettemeler júktelgende ǵana máseleni aıtarlyqtaı azaıtýǵa bolady.
Almaty áýejaıyndaǵy avtoturaqtar keńeıtiledi
«Eýropa elderinde qala turǵyndarynyń 60 paıyzy kólik máselesin rettese másele sheshilgen bolyp esepteledi. Qazirgi tańda bizde, elordada 10 myńnan astam aqyly turaqtyń ózi azdyq etip otyr. Sol sebepten muny tek qurylys kompanııalaryna avtoturaq sanyn arttyrýdy minddetteý arqyly sheshýge bolady», deıdi A.Jańabaev.
Eske sala keteıik, byltyr jyl sońynda elordadaǵy aqyly turaqtardyń barlyǵy kommýnaldyq menshikke ótken bolatyn. Osyǵan baılanysty qaladaǵy avtoturaqtardyń qoldanystaǵy tarıfteri qaıta qaralyp, jol ýchaskesine qaraı kólikti 15-60 mınýttyq tegin qoıý júıesi qarastyrylǵan edi.
Nurbolat AMANBEK
