Foto: Úkimettiń baspasóz qyzmeti
Otyrysta Memleket basshysynyń ekonomıkanyń sapaly ári ornyqty ósimin qamtamasyz etý jónindegi tapsyrmalaryn iske asyrý barysy talqylandy. Úkimet bul mindetti óńdeý ónerkásibin damytý, ınvestısııalyq belsendilikti arttyrý jáne óndiristerdi tehnologııalyq jańǵyrtý arqyly júzege asyryp otyr.
«Memleket basshysy Úkimettiń keńeıtilgen otyrysynda ekonomıkanyń sapaly ári ornyqty ósimin qamtamasyz etýdi tapsyrdy. Bul mindet óńdeý ónerkásibin damytý, ınvestısııalyq belsendilikti arttyrý jáne óndiristerdi tehnologııalyq jańǵyrtý arqyly júzege asyrylady», dedi Oljas Bektenov.
Premer-mınıstr ekonomıkalyq ósim qurylymyna erekshe nazar aýdaryp, salalardyń úlesi men ishki ekonomıkanyń turaqtylyǵyn atap ótti. Onyń aıtýynsha, I toqsan qorytyndysy boıynsha IJО́-niń naqty ósimi 3% boldy.
Sondaı-aq ósimniń negizgi bóligi shıkizattyq emes sektor esebinen qamtamasyz etilgeni aıtyldy. Ásirese óńdeý ónerkásibi, kólik, qurylys jáne saýda salalary turaqty ósim kórsetken.
«Osy kezeńde jalpy ishki ónimniń naqty ósimi 3% boldy. Bul kórsetkish, eń aldymen, shıkizattyq emes sektordaǵy turaqty ósim esebinen qalyptasty. Atap aıtqanda, óńdeý ónerkásibi, kólik, qurylys jáne saýda salalary oń dınamıka kórsetti. Syrtqy ekonomıkalyq jaǵdaıdyń nasharlaýyna qaramastan, dál osy shıkizattyq emes sektor óziniń turaqtylyǵy men básekege qabilettiligin dáleldep otyr», dedi Oljas Bektenov.
Jalpy, ekonomıkany ártaraptandyrýǵa basymdyq berý eldiń syrtqy faktorlarǵa táýeldiligin azaıtyp, ishki naryqtyń turaqtylyǵy men básekege qabilettiligin arttyrýǵa múmkindik berip otyr.
