Eýrokomıssııa ókiliniń aıtýynsha, atalǵan qarajattyń 18 mıllıard eýrosy EO baǵalaýynsha quqyq ústemdiginiń buzylýy, jemqorlyq táýekelderiniń joǵary bolýy jáne sot júıesiniń táýelsizdigine nuqsan kelýi sebepti toqtatylǵan. Taǵy 17 mıllıard eýro tómen paıyzben qorǵanys nesıeleri retinde berilýi tıis bolǵan. Qarajattyń buǵattalýy Býdapesht pen Brıýssel arasyndaǵy qaqtyǵystarǵa, sondaı-aq premer-mınıstr Vıktor Orban talap etilgen reformalardy júrgizýden bas tartqanyna baılanysty júrgizilgen.
Qarajatty qaıta alý úshin Vengrııa 27 shartty oryndaýy kerek. Onyń ishinde jemqorlyqqa qarsy tekserýler júrgizý jáne Orban kezeńinde qabyldanǵan, EO erejelerine qaıshy dep tanylǵan sheshimderdi joıý bar.
Basylymnyń málimetinshe, Eýrokomıssııa Madıar saılaýda jeńiske jetkennen keıin birden onymen baılanys ornatyp, Ýkraınamen qarym-qatynasty qalpyna keltirýdi jáne buǵattalǵan qarajatty alý úshin reformalardy bastaýdy talap etken.
Eýroodaq talaptaryna sáıkes Brıýssel jańa bılik Ýkraınaǵa 90 mıllıard eýro kólemindegi nesıege qoıylǵan vetony alyp tastaıdy, Reseıge qarsy 20-sanksııalar paketin qabyldaýǵa kelisedi, «Drýjba» qubyry arqyly munaı jetkizýdi qaıta bastaý talabynan bas tartady jáne Kıevpen EO-ǵa múshelik boıynsha tikeleı kelissózderdi bastaýǵa qarsylyq bildirmeıdi dep úmittenedi.
Vengrııadaǵy Radio Free Europe qyzmeti qarjylandyrý qysqarýyna baılanysty jumysyn toqtatty
Eske salaıyq, jeksenbi kúni Vengrııada parlament saılaýy ótti. Saılaý komıssııasynyń málimeti boıynsha, daýystardyń 98,9%-y sanalǵannan keıin «Tısa» partııasy Vıktor Orban jetekshilik etetin Fıdes partııasynan aıtarlyqtaı basymdyqpen jeńiske jetken.
Nurbolat AMANBEK
