Partııanyń Saıası menedjment akademııasy jańa formatta aýyldyq okrýgterdiń saılanǵan ákimderin, máslıhat depýtattaryn jáne bastaýysh partııa uıymdarynyń ókilderin oqytý jumysyn bastady. Jańa baǵdarlama basqarýshylyq quzyretterdi arttyryp qana qoımaı kóshbasshylyq qasıetterdi damytyp, strategııalyq oılaýdy jetildirý men memlekettik jobalyq basqarýdy meńgertýdi kózdeıdi. Oqytý jumysy Abaı oblysynda bastalady.
Jıynda Májilis spıkeri, «Amanat» partııasynyń tóraǵasy Erlan Qoshanov álem qarqyndy ózgerip jatqanyn, jahandyq turaqsyzdyq jaǵdaıynda jappaı sıfrlandyrý men jasandy ıntellekt jańa ómir shyndyǵyna aınalǵanyn atap ótti. Jańa syn-qaterlerge laıyqty jaýap berý úshin Memleket basshysynyń bastamasymen elimizde aýqymdy reformalar qolǵa alyndy. Bul qadam azamattardyń el basqarý isine aralasýyn keńeıtip keledi. «Amanat» partııasy jalpyulttyq úderisterge tikeleı qatysady. Sondyqtan partııalastar jańa jaǵdaıda alǵa qoıylǵan mindetterdi laıyqty ári tıimdi oryndaý úshin jańa quzyretterdi belsendi túrde meńgerýi qajet.
«Prezıdent Qasym-Jomart Toqaev halyqaralyq qatynastardyń moıyndalǵan mamany, álemdik deńgeıdegi dıplomat retinde osyndaı progressıvti úrdisterdi jaqsy biledi. Memleket basshysy «Alǵan dıplomyń ómir boıy azyq bolady» degen túsiniktiń eskirgenin, bul uǵymnyń ornyn «О́mir boıy oqy jáne úıren» degen qaǵıda basqanyn únemi aıtyp júr. Onyń ústine, jańa Konstıtýsııada adam kapıtalyn damytý, bilim men ǵylym strategııalyq basymdyq retinde bekitildi. Bul bizdiń basty resýrsymyzǵa aınaldy. Osy baǵdardy basshylyqqa alǵan «Amanat» partııasy búgin jergilikti kadrlardy oqytý baǵdarlamasyn bastap otyr. Olar ózine jaýapkershilik ala alatyn, tabandy, tıimdi sheshim qabyldaı biletin maman bolýy kerek», dedi Májilis tóraǵasy.
Erlan Qoshanov saılanǵan aýyl ákimderi, máslıhat depýtattary jáne BPU ókilderi búginde halyq senim artatyn, azamattar óz máselelerin sheshý úshin júginetin naǵyz óńirlik elıta ekenin erekshe atap ótti. Bul rette, aýyl ákimderi memlekettik baǵdarlamalardy júzge asyrýdan bastap, áleýmettik ınfraqurylymdy damytýǵa deıingi keń aýqymdy máselelerge jaýap bere otyryp, úlken júkteme arqalap otyr. О́z kezeginde, máslıhat depýtattary memleket pen qoǵam arasyndaǵy ózara baılanystyń negizgi býyny retinde qarastyrylady. Azamattardyń senimi men óńirlerdegi turaqtylyq deńgeıi olardyń kásibı sheberligine, kommýnıkasııa sapasyna tikeleı baılanysty. Partııanyń kún tártibin júzege asyrý isinde 3800 BPU erekshe ról atqarady. Dál osy deńgeıde qoǵamdyq pikir qalyptasyp, halyqpen keri baılanys qamtamasyz etiledi.
Partııa tóraǵasy jańa oqý jobasy bolashaǵy zor basqarýshylardy anyqtaýǵa arnalǵan platformaǵa aınalatynyn erekshe atap ótti. Baǵdarlama aıasynda partııanyń kadrlyq rezervi qalyptasyp, memlekettik jáne qoǵamdyq-saıası qyzmette ilgeriletýge baǵdarlanǵan tıimdi ári básekege qabiletti kóshbasshylar daıarlanady.
Jańa oqý jobasyna qatysty pikir bildirgen partııa hatshysy Sholpan Karınova jańa oqý baǵdarlamasy qoldanbaly tásilimen erekshelenetinine jáne zamanaýı ǵylymı zertteýlerge súıenetinine nazar aýdardy.
«Saıası menedjment akademııasy usynyp otyrǵan jańa bilim berý baǵdarlamasy tájirıbelik baǵytymen erekshelenedi. Baǵdarlamada áriptesterimizge qyzmet barysynda kezdesetin túrli jaǵdaıǵa naqty sheshim usynylady. Baǵdarlama Nazarbaev ýnıversıteti, AlmaU, SDU jáne BIL syndy jetekshi joǵary oqý oryndary ǵalymdarynyń qatysýymen ázirlendi. Ál-Farabı atyndaǵy Qazaq ulttyq ýnıversıteti janyndaǵy Respýblıkalyq oqý-ádistemelik keńes oqytý baǵdarlamasynyń modýldik qurylymyn maquldady. Sondaı-aq elimizdegi joǵary oqý oryndary bul oqytý modýlderin óz baǵdarlamalaryna engize alady», dedi partııa hatshysy.
Is-shara barysynda Memlekettik qyzmet isteri agenttiginiń tóraǵasy Darhan Jazyqbaı memlekettik qyzmet salasynyń basshylyq quramyn tolyqtyrý barysynda «Amanat» partııasy músheleriniń áleýeti ashyq ári básekeli sıfrlyq irikteýler arqyly belsendi paıdalanylyp jatqanyn atap ótti. Istanbul Kent University ekonomıka, ákimshilik jáne áleýmettik ǵylymdar fakýltetiniń dekany Hasret Chomak partııa baǵdarlamasy naqty nátıjege negizdelgenin jáne saıası sheshimderdi turǵyndardyń turmysyn jaqsartýǵa baǵyttaıtyn kóshbasshylardy daıarlaýdy kózdeıtinin aıtty. Abaı oblysynyń ákimi Berik Ýálı jańa modýldik baǵdarlama aýyl ákimderiniń zańnamany is júzinde qoldaný daǵdysyn qalyptastyrýǵa baǵyttalatynyn, olar bıýdjettik resýrstardy tıimdi basqarýdy – bıýdjettik vertıkaldi túsinýden bastap, óz kiris bazasyn damytýdy, salyq túsimderin arttyrýdy jáne aýmaqtardyń ekonomıkalyq ósimin yntalandyrýdy meńgeretinin atap ótti.
Sondaı-aq is-sharada Ǵylym jáne joǵary bilim vıse-mınıstri Gúlzat Kóbenova, Nazarbaev ýnıversıteti Joǵary memlekettik saıasat mektebiniń professory, ıtalııalyq saıası tehnolog Rıkardo Pelısso, Soltústik Qazaqstan oblysy Maǵjan Jumabaev aýdany máslıhatynyń tóraǵasy Aızada Rahmetova jáne «Jetigen» BPU tóraǵasy, Alataý qalasy Jetigen shaǵyn aýdanyndaǵy №11 orta mekteptiń mýzyka páni muǵalimi Anastasııa Melnık, Atyraý ýnıversıtetiniń rektory Salamat Idrısov, Shyǵys Qazaqstan ýnıversıtetiniń rektory Muhtar Tólegen jáne Toraıǵyrov ýnıversıtetiniń rektory Nurlan Medetov sóz sóıledi.
Jańa oqý baǵdarlamasynyń bastalýyna memlekettik organdar men akademııalyq qaýymdastyq ókilderi, sondaı-aq beınekonferensııa baılanysy arqyly partııanyń óńirlik fılıaldarynyń qyzmetkerleri qatysty.
