Sýret: astanatv.kz
Túrkistan kóshesindegi 21 qabatty turǵyn úıdiń 15-qabatyndaǵy páterde órttiń neden tutanǵany anyqtalyp jatyr. Tótenshe jaǵdaılar mınıstrliginiń baspasóz qyzmeti oqıǵa ornyna TJM kúshteriniń alǵashqy bólimsheleri jetkende qyzyl jalyn kúshine mingen edi.
«О́rtti sóndirý barysynda janyp jatqan páterden kúıik alǵan áıel qutqarylyp, jedel medısınalyq járdem brıgadasyna tapsyryldy. Ol №1 kópsalaly qalalyq aýrýhanaǵa jatqyzyldy. Oqıǵa ornynan kámeletke tolmaǵan úsh balanyń denesi tabyldy. TJM kúshterimen joǵarǵy qabattardan 20 adam evakýasııalandy, taǵy 40-qa jýyq adam ǵımarattan óz betinshe shyqty. О́rt tolyq sóndirildi. О́rttiń shyǵý sebebi anyqtalyp jatyr», delingen mınıstrliktiń málimetinde. Qaıǵyly oqıǵa quzyrly oryndardyń baqylaýynda, ákimdik tarapynan zardap shekken áıel men qaza tapqan balalardyń otbasyna qajetti kómek kórsetetini de aıtyldy.
Astana qalasy Tótenshe jaǵdaılar departamenti bastyǵynyń orynbasary О́mirjan Tuqyshev tilsiz jaý sharpyǵan páterdiń syrtqy temir esigine bir emes, eki qulyp ornatylǵanyn, qutqarýshylar arnaıy quraldyń kómegimen buzyp ashqanyn aıtty. О́rt dabyly men habarlaý júıesi iske qosylyp, lıftiler birinshi qabatqa avtomatty túrde túsirilgen. Kópqabatty turǵyn úıdiń aýlasynyń kireberisi metall qaqpamen jabylyp, joldyń jıeginde jeńil kóliktiń bógesin bolǵanyna qaramastan, TJD kúshteri órttiń kórshi páterlerdi sharpýyna jol bermedi. О́rt faktisine qatysty sotqa deıingi tergeý bastalyp, oqıǵanyń mán-jaıy men shyǵý sebebin anyqtaıtyn saraptamalar taǵaıyndaldy. Astana qalasynyń polısııa departamenti qylmystyq is qozǵalǵanyn málimdedi.
Qaıǵyly oqıǵanyń kýágerleri órt sóndirý tehnıkalarynyń kópqabatty turǵyn úıdiń aýlasyna jetýine jol jıegine qańtarylǵan jeńil kóliktiń ájeptáýir kedergisi tıgenin aıtady. Adam ómirine arasha túser qarbalas sátte bir mınýttyń ózi mańyzdy. Qutqarýshylar dittegen mejege esh kedergisiz jetkende múmkin úsh bala aman qalar ma edi? О́z ómirin qaterge tigip, ózgeniń amandyǵy jolynda táýekelge bel baılaıtyn qutqarýshylardyń qysyltaıań shaqtaǵy jankeshti isine kóldeneń bolǵan bul birinshi derek emes. О́kinishtisi, mundaı keleńsizdik jıi qaıtalanady. Kópqabatty úılerdiń aýlasyn jaǵalaı kólik turaǵyna aınaldyrǵan turǵyndardyń keıbiri joldy bógep, ózgege kedergi keltiretin jaıt jıi bolady. Qutqarý qyzmetiniń tehnıkalary ǵana emes, ómir men ólim arpalysqan jedel járdem kóligine de kóshede yǵyspaı júrisin tejeıtinderge tártiptik shara qatańdatylýǵa tıis. Májilis depýtaty Qazybek Isa qutqarýshylardyń qyzmetine kedergi keltirgenderge ákimshilik is qozǵalyp, arzymaıtyn aıyppul salý azdyq etetinin aıtady.
«Astana qalasynda alapat órttiń kesirinen úsh birdeı baldyrǵan ajal qushty. 2019 jyly elorda irgesindegi jer úıde tutanǵan órtten bútindeı bir shańyraqtyń bes birdeı baldyrǵan qyzy órtenip ketkenin bilemiz. Mundaı adam ómirine ákelip soqqan oqys oqıǵalar, ókinishke qaraı, jıi qaıtalanady. Tilsiz jaýdy óshirýge kelgen, tótenshe jaǵdaıda azamattardy qutqarýǵa umtylǵan arnaıy sala mamandarynyń jumysyna kedergi bolǵandarǵa taǵylar jazany kúsheıtý qajet. Eýropa elderinde mundaı jaǵdaıda qutqarýshylar kóldeneń bolǵan kólikti kóterip, bolmasa súırep aýlaqqa aparyp tastaıdy. Al Astanadaǵy órt kezinde jol jıegine kóligin qoıyp ketken azamatty izdep tapqansha sút pisirim ýaqyt ótken. Mundaı oqıǵa kezinde aıyppul mólsherin arttyryp, jazany qatańdatý qajet», deıdi Q.Isa.
Tótenshe jaǵdaılar qyzmeti mamandary turǵyndarǵa qaýipsizdik sharasyn qatań saqtaýdy árdaıym eskertedi. О́rt sóndiretin arnaıy tehnıkalar men jedel járdem kólikteriniń kedergisiz qatynaýyna jol ashyq bolýǵa tıis. Kóldeneń jaıt ýaqytty jutady. Qyzyl jalyndy sóndirip, turǵyndardy qutqarýǵa jumylǵan arnaıy bólim qyzmetkerleriniń ár mınýty – adam ómirine arasha túser mezet ekenin árkim jadynda ustaǵany jón.
Mundaı qaıǵyly oqıǵa budan keıin de qaıtalanbasyna eshkim kepildik bermeıdi. Kók tiregen záýlim ǵımarat salarda qurylys kompanııalary turǵyndarǵa jaıly ortany da oılaǵan abzal. Irkes-tirkes boı kótergen turǵyn úılerdiń aýlasy da anaý aıtqandaı keń emes, kólik turaǵy da tar. Ár turǵyn úıdiń parkıngindegi oryn páter sanymen eseptegende 20 paıyzyn da qamtymaıdy. Bútindeı bir otbasy qaıǵy jamylǵan qaraly oqıǵadan sabaq alsaq ıgi. Adam ólimine ákelip soqqan oqıǵaǵa aıyptylardy jazalarda zań solqyldaq, úkim úlpildek bolmaýy kerek.
