Depýtattardyń aıtýynsha, sońǵy ýaqytta qoǵamda jalǵan bedel men orynsyz marapatqa umtylý úrdisi kúsheıip keledi. Ásirese, túrli uıymdar men qaýymdastyqtar tarapynan beriletin tósbelgiler men medaldardyń sany artqan. Bul jaǵdaı marapattardyń qundylyǵyn tómendetip, eńbekke negizdelgen ádil baǵalaý júıesine keri áser etip jatyr. Saýalda naqty mysaldar keltirilgen. Atap aıtqanda, 2025 jyly «Qazaqstan ardagerleri» qoǵamdyq birlestigi tarıhı tulǵalardyń atymen marapattar tabystaǵan. Alaıda olardyń ataýy men dızaıny memlekettik nagradalarǵa uqsas dep tanylyp, uıymdastyrýshylardyń biri ákimshilik jaýapkershilikke tartylǵan.
Depýtattar qoldanystaǵy zańnamada «qoǵamdyq marapat» uǵymynyń naqty bekitilmegenin atap ótti. Sonyń saldarynan qoǵamdyq uıymdar beretin marapattar tıisti quqyqtyq baqylaýdan tys qalyp otyr.
«Qoǵamdyq marapat uǵymyn zańǵa engizý, tarıhı tulǵalardyń esimderin jáne joǵary mártebeli ataýlardy paıdalanýǵa shekteý qoıý, sondaı-aq marapattardyń ataýy men dızaınyna mindetti saraptama engizý qajet», delingen saýalda.
Depýtattardyń pikirinshe, bul sharalar marapattaý júıesiniń ádildigin qamtamasyz etip, memlekettik nagradalardyń bedelin saqtaýǵa múmkindik beredi.
