Foto: Aqorda
«Baýyrlastyǵymyz ózara senim men qurmetke negizdelgen. Dıplomatııalyq qatynas ornaǵan 35 jylǵa jýyq ýaqyt ishinde biz kóptegen bıik belesti baǵyndyrdyq. Qarym-qatynasymyz joǵary qarqynmen damyp kele jatyr. Aramyzda eshqandaı túıtkil joq. 14 mamyrda Prezıdent Rejep Taııp Erdoǵan elimizge memlekettik saparmen keledi. Sapar aıasynda Strategııalyq yntymaqtastyq keńesiniń kezekti otyrysyn ótkizemiz. Jańa kelisimderge qol qoıamyz», dedi Memleket basshysy.
Sonymen qatar Qasym-Jomart Toqaev búgin Astanada Qazaqstan Premer-mınıstri jáne Túrkııa Vıse-prezıdentiniń teń tóraǵalyǵymen ótken Úkimetaralyq komıssııa qorytyndysy eki eldiń san qyrly áriptestigin odan ári jandandyra túsetinine senim bildirdi.
Djevdet Iylmaz qazaq elinde kórsetilgen syı-qurmet úshin Memleket basshysyna alǵys aıtty. Sondaı-aq Prezıdent Rejep Taııp Erdoǵannyń sálemi men ystyq yqylasyn jetkizip, Túrkııa kóshbasshysy Qazaqstanǵa memlekettik saparyna jáne Túrki memleketteri uıymynyń Túrkistandaǵy beıresmı sammıtine erekshe mán berip otyrǵanyn málimdedi.
«Joǵary deńgeıde qol jetkizilgen ýaǵdalastyqtardy iske asyrý aıasynda jańa ǵana Premer-mınıstr Oljas Bektenov myrzamen birge Úkimetaralyq saýda-ekonomıkalyq komıssııasynyń 14-otyrysyn ótkizdik. Onyń qorytyndysy boıynsha túrli saladaǵy naqty sharalardy iske asyratyn birlesken is-qımyl josparyna qol qoıyldy. Bul qujat aldaǵy kezeńge arnalǵan saýda-ekonomıkalyq yqpaldastyǵymyzdyń jol kartasyna aınalady», dedi Túrkııa Vıse-prezıdenti.
Djevdet Iylmaz jańa Konstıtýsııany qabyldaý boıynsha jalpyulttyq referendýmnyń tabysty ótýimen quttyqtap, Qazaqstannyń ósip-órkendeýine tilektestik bildirdi.
Memleket basshysy osy tarıhı sátte baýyrlas túrik halqynyń qoldaýyn sezingenin, Túrkııadan kelgen baıqaýshylar referendýmǵa erekshe atsalysqanyn atap ótti.
Áńgimelesý barysynda eki eldiń saýda-ekonomıkalyq, mádenı-gýmanıtarlyq yntymaqtastyǵyn nyǵaıtý perspektıvasy talqylandy. Sonyń ishinde óńdeý ónerkásibi, ınfraqurylym, energetıka, logıstıka, agroónerkásip kesheni, bilim jáne týrızm salalarynda birlesken jobalardy júzege asyrý múmkindikteri qarastyryldy.
Budan bólek, Qasym-Jomart Toqaev pen Djevdet Iylmaz halyqaralyq kún tártibindegi ózekti máseleler, Taıaý Shyǵystaǵy kúrdeli ahýal jóninde pikir almasty.
Memleket basshysy Túrkııanyń aımaqtaǵy turaqtylyqty qamtamasyz etýdegi rólin joǵary baǵalap, aldaǵy Antalııa dıplomatııalyq forýmyna qatysatynyn rastady.
