Malaızııanyń Pýtradjaıa ákimshilik ortalyǵynda Qazaqstannyń kandıdatýrasyn BUU Qaýipsizdik Keńesiniń turaqty emes músheligine ilgeriletý boıynsha Qazaqstan Prezıdentiniń Arnaıy ókili – Syrtqy ister mınıstriniń orynbasary Asqar Mýsınov Malaızııanyń Premer-mınıstri Nadjıb Týn Abdýl Razakpen kezdesti.
Kezdesý barysynda 2014 jyly 22-24 mamyrdaǵy Malaızııa Premer-mınıstriniń Qazaqstanǵa saparynyń qorytyndylary aıasynda ekijaqty qatynastardyń qazirgi jaǵdaıy men bolashaq damý múmkindikteri talqylandy. Premer-mınıstr eki el arasyndaǵy saıası únqatysýdyń damý qarqynyn jáne Qazaqstannyń táýelsizdik jyldaryndaǵy áleýmettik-ekonomıkalyq tabystaryn joǵary baǵalady. N.Razak Qazaqstannyń ekonomıkasy damyǵan, saıası jáne áleýmettik júıesi turaqty, egemen memleket bolyp qalyptasýyndaǵy Prezıdent Nursultan Nazarbaevtyń rólin erekshe atap ótip, 26 sáýirdegi kezekten tys prezıdenttik saılaýda Memleket basshysynyń úlken basymdyqpen jeńiske jetkenine tánti bolǵanyn bildirdi. Kezdesý barysynda 2017-2018 jyldary BUU Qaýipsizdik Keńesiniń turaqty emes músheligine Qazaqstannyń kandıdatýrasyn qoldaý jónindegi Qazaqstan Prezıdentiniń Malaızııa Premer-mınıstrine joldaǵan haty tabystaldy. A. Mýsınov BUU QK turaqty emes múshesi bolyp saılaný Qazaqstannyń syrtqy saıasatyndaǵy mańyzdy basymdyqtarynyń biri bolyp tabylatynyn jáne Qazaqstan álemdik turaqtylyq pen qaýipsizdikke óz úlesin qosýǵa múddeli ekenin atap ótti. Sonymen birge, Malaızııanyń BUU QK 2015-2016 jyldary turaqty emes músheliginde bastaǵan álemdik tártipti zańnamaǵa saı nyǵaıtý, BUU bitimgershilik kúshterin qoldaý jáne t.b. isterin jalǵastyrýǵa nıetti. A.Mýsınov Malaızııanyń «Azyq-túlik qaýipsizdigi jónindegi ıslam uıymy» jańa halyqaralyq qurylymyna qosylatynyna úmit artyp, atalǵan uıymnyń jarǵysyna Islam Yntymaqtastyq Uıymyna múshe 23 memlekettiń qol qoıǵanyn habarlady. N.Razak elimizdiń halyqaralyq sahnadaǵy jetistikterin jáne belsendiligin atap ótip, Qazaqstannyń BUU QK turaqty emes múshesi bolýǵa degen nıetin joǵary baǵalady. Sol kúni qazaqstandyq delegasııa Malaızııanyń Syrtqy ister mınıstrliginiń basshylyǵymen de kelissózder júrgizdi.
«Egemen-aqparat».
