Foto: primeminister.kz
Konferensııanyń alǵashqy kúnindegi negizgi oqıǵa – «Jasandy ıntellekt: Qazaqstan qaýipsizdiktiń jańa modelin qalyptastyrýda» atty strategııalyq plenarlyq sessııa boldy. Onda Eńbek jáne halyqty áleýmettik qorǵaý birinshi vıse-mınıstri Erbol Tuıaqbaev elimizdegi eńbekti qorǵaý júıesin sıfrlandyrýdyń qazirgi jaǵdaıy men damý baǵyttaryn tanystyrdy. Baǵdarlamaǵa jalpy 11 taqyryptyq sessııa jáne bıznes-oıyndar engizilgen.
Is-sharany Eńbek jáne halyqty áleýmettik qorǵaý mınıstrligi, Tótenshe jaǵdaılar mınıstrligi, Eńbekti qorǵaý jónindegi respýblıkalyq ǵylymı-zertteý ınstıtýty jáne «ITECA» kompanııasy uıymdastyrǵan.
Konferensııaǵa memlekettik organdar men halyqaralyq uıymdardyń ókilderi, salalyq qaýymdastyq jetekshileri men sarapshylar qatysyp otyr. Olardyń qatarynda HEU, DDU mamandary, sondaı-aq óndiris pen ǵylym salasynyń ókilderi bar.
Strategııalyq sessııada sarapshylar óndiristegi qaýipsizdikti arttyrýda jasandy ıntellekttiń sheshýshi róline toqtaldy. Ásirese táýekelderdi erte anyqtaý, óndiristik jaraqattanýdy azaıtý jáne predıktıvti analıtıkany qoldaný máseleleri keńinen qaraldy. Sonymen birge taý-ken jáne ónerkásip salalarynda JI algorıtmderin engizý tájirıbesi usynyldy.
Sońǵy bes jyldaǵy oń ózgeris: Elimizde óndiristik jaraqattaný deńgeıi 8,3%-ǵa azaıdy
Erbol Tuıaqbaev óz sózinde bıyl elimizde Sıfrlandyrý jáne jasandy ıntellekt jyly jarııalanǵanyn atap ótip, bul eńbek qaýipsizdigi salasyna jańa serpin beretinin aıtty.
«Jahandyq syn-qaterler jaǵdaıynda sıfrlyq transformasııa qaýipsiz ári laıyqty eńbekke keń múmkindik ashady», dedi birinshi vıse-mınıstr.
Onyń aıtýynsha, sońǵy jyldary óndiristik jaraqattaný tómendeý úrdisin kórsetkenimen, ár oqıǵanyń artynda adam taǵdyry turǵandyqtan, aldyn alý sharalaryn kúsheıtý qajet. Qazaqstan Halyqaralyq eńbek uıymynyń 26 konvensııasyn ratıfıkasııalap, eńbek quqyqtaryn qorǵaý baǵytynda birqatar reformany júzege asyrdy.
Vıse-mınıstr áleýmettik-eńbek salasyn sıfrlandyrýǵa erekshe toqtaldy. Qazir elimizde Kásiporyndardyń sıfrlyq kartasy men Eńbek táýekelderiniń kartasy jumys isteıdi. Aldaǵy ýaqytta jumys ortasyn naqty ýaqyt rejıminde baqylaıtyn biryńǵaı ahýaldyq ortalyq iske qosylady.
«Eńbekti qorǵaýdy sıfrlandyrý – strategııalyq baǵyt. Basty maqsat – árbir azamat úshin qaýipsiz ári laıyqty eńbek jaǵdaıyn qamtamasyz etý», dedi Erbol Tuıaqbaev.
KIOSH 2026 baǵdarlamasy 29 sáýirde ónerkásiptik qaýipsizdik máselelerimen jalǵasady. Onda táýekelderdi proaktıvti basqarý, sıfrlyq quraldardy engizý jáne óndiristegi iri oqıǵalardyń aldyn alý tetikteri talqylanady. Sonymen qatar praktıkalyq trenıngter men Safety Games formatyndaǵy ınteraktıvti jattyǵýlar ótedi.
Bıylǵy kórmege 9 elden 87 kompanııa qatysyp otyr. Olardyń ishinde 53 sheteldik jáne 34 otandyq kásiporyn bar. Kórmege alǵash ret qatysyp otyrǵan 18 kompanııanyń bolýy eńbek qaýipsizdigi salasyndaǵy halyqaralyq qyzyǵýshylyqtyń artyp kele jatqanyn kórsetedi.
