Bul joba jádigerlerdi tek kórý ǵana emes, olardy qolmen ustap seziný jáne zamanaýı tehnologııalar arqyly tanýdyń jańa múmkindikterin ashty.
Qordaı aýdanyndaǵy Kenen Ázirbaev atyndaǵy ádebı-memorıaldyq mýzeıi bazasynda ótken shara «Qolyńmen ustap, júrekpen sezin!» tanymdyq buryshyn tolyqtyra tústi. Áıgili halyq aqyny, jyraý, Qazaqstannyń eńbek sińirgen óner qaıratkeri Kenen Ázirbaevtyń ómiri men shyǵarmashylyǵyna arnalǵan jádigerler kópshilik nazaryna usynyldy. Zaǵıp oqyrmandar Kenen atanyń turmysta paıdalanǵan jeke zattary men kıimderin qoldarymen ustap tanysty. Kórý qabileti tómen azamattar úshin 26 jádigerge arnaıy QR-kodtar ornatyldy. Smartfon kómegimen jádigerler týraly tolyq aqparat alý tetigi mazmundyq turǵydan jetildirildi.
Shý aýdandyq tarıhı-ólketaný mýzeıi men arnaıy kitaphana birlesip, «Janarsyz da jaryq álem» atty shara uıymdastyrdy. «Tıflomýzeı» jobasy aıasynda munda 20 QR-kod ornatylyp, kelýshilerge tarıhı eksponattardyń mazmuny sıfrlyq formatta qoljetimdi boldy. Kerosın shamy, shoq útik, kúbi, qobyz, pıoner barabany, rýbel men júgen sekildi ulttyq qundylyǵy joǵary buıymdardyń tarıhy jan-jaqty tanystyryldy.
Eki sharanyń da basty múddesi – erekshe qajettiligi bar azamattardyń mýzeı ekspozısııalaryna erkin qol jetkizýine jaǵdaı jasaý jáne estý, seziný arqyly tanymdyq kókjıegin keńeıtý. Shara aıasynda kitaphana qoryna jańadan kelip túsken ádebıetterden «Kitap – tarıh aınasy, shejire – urpaq murasy» atty kitap kórmesi jasalyp, bıblıografııalyq sholý usynyldy.
Jıyn sońynda kitaphana oqyrmandary men mýzeı qonaqtary alǵan áserlerimen bólisip, mádenıetti sıfrlandyrý men ınklıýzıvti orta qalyptastyrýǵa úles qosyp júrgen uıymdastyrýshylarǵa rızashylyǵyn bildirdi.
