Mańǵystaý oblysynda 8 jasar qyzdy zorlap, óltirip ketken

AQTAÝ. 14 mamyr. Keshe Mańǵystaý oblysyndaǵa Saı-О́tes aýylynda aldymen zorlanyp, artynan óltirilgen 8 jasar qyzdyń denesi tabyldy. Bul týraly Tumba.kz habarlady. Qaıǵyly oqıǵa oblys ortalyǵynan 285 shaqyrym jerdegi Saı-О́tes aýylynda oryn alǵan. Qyzdyń týystarynyń aıtýynsha, burnaǵy kúni aýlada oınap júrgen qyz keshke úıine oralmaǵan. Sodan keıin búkil otbasy dalaǵa shyǵyp, qyzdy izdeýge kirisedi. Olar kóp izdep júrip, bir kezde bir saraıdyń janynda ólip jatqan qyz balanyń ústinen túsedi. «Denesi topyraqpen kómilipti. Bizdiń kórgenimiz boıynsha, ony zorlaǵan, keıin aýzyna topyraq salǵan, ol sodan tunshyǵyp ólgen», - dedi qyzdyń týysy Fatıma Elýbaeva. Polıseıler qyzdyń ólgenin rastap berdi. Qyz balanyń joǵalyp ketkeni týraly habar jetken boıda izdestirý jumystaryn júrgizý úshin shuǵyl qyzmet jasaǵy jiberilgen. Quqyq qorǵaý organdary qyzmetkerleri 8 jasar qyzdyń ólimine kúdiktini sol túni qolǵa túsiredi. Ol osy aýyldyń 1988 jyly týǵan turǵyny bolyp shyqty. «Qyzdyń denesi tap sonyń saraıynyń janynan tabyldy. Qazir tergeý amaldary júrip jatyr. Zorlaý deregi tekserilýde. Aldyn ala málimet boıynsha, qyz bala kúdiktiniń onyń tynys joldaryna topyraq salýynyń saldarynan kóz jumǵan. О́liminiń naqty sebebin bizdiń krımınalıster taǵaıyndaǵan saraptama kórsetedi», - dedi oblystyq ishki ister departamenti baspasóz qyzmetiniń jetekshisi Álııa Shermaǵambetova. Qyzdyń týystarynyń aıtýynsha, kúdikti tórt ret úılengen. Qazir ol sońǵy áıelimen birge úsh bala tárbıelep otyr eken. Gúlaıym Shyntemirqyzy. Derek, sýret: Tumba.kz.