Jańa oqý orny Arizona State University (ASU) ýnıversıtetimen birlesip ashylyp, Cintana Education alıansynyń quramyna endi. Ýnıversıtet baǵdarlamalary halyqaralyq standarttarǵa saı ázirlengen jáne jasandy ıntellekt, kıberqaýipsizdik, sıfrlyq bıznes baǵyttaryna basymdyq beredi.
Bilim ordasynyń ashylý saltanatynda sóz sóılegen Ǵylym jáne joǵary bilim mınıstri Saıasat Nurbek bul bastamanyń strategııalyq mańyzyn atap ótti.
«Bizdiń basty maqsatymyz – Qazaqstandy óńirlik akademııalyq jáne zertteý habyna aınaldyrý. Qazirdiń ózinde elimizge 35 myńnan astam sheteldik stýdent kelip otyr – bul tarıhı kórsetkish. Endigi mindet – osy áleýetti kúsheıtip, ýnıversıtetterimizdi oqytý modelinen zertteýshi formatqa kóshirý. О́kinishke qaraı, búgingi tańda kóp joǵary oqý oryndary tek bilim berýmen shekteledi. Al álemdegi úzdik ýnıversıtetter – ǵylym, ınnovasııa jáne tehnologııanyń ortalyǵy. Sondyqtan mundaı seriktestikter arqyly biz naqty ǵylymı jobalardy iske qosyp, tehnologııa transferin qamtamasyz etemiz», dedi mınıstr.
Onyń aıtýynsha, buǵan deıin de sheteldik ýnıversıtettermen birlesken jobalar oń nátıjesin berip, jańa materıaldar óndirý, ónerkásipke qajet tehnologııalardy engizý baǵytynda naqty jumystar bastalǵan.
Ashylý saltanatyna kelgen AQSh-tyń Qazaqstandaǵy elshisi Djýlı Stafft bul jobany eki el arasyndaǵy bilim men ǵylym salasyndaǵy yntymaqtastyqtyń jańa kezeńi dep baǵalady.
«InnoTech – Qazaqstan men AQSh arasyndaǵy seriktestiktiń jańa belesi. Stýdentter Almatyda otyryp-aq álemdik deńgeıde bilim ala alady», dedi ol.
Ýnıversıtet ókilderiniń aıtýynsha, Innotech-tiń basty maqsaty – halyqaralyq standartqa saı bilim berip qana qoımaı, bolashaqta iri ǵylymı-akademııalyq ekojúıeniń bir bóligine aınalý. Qazirgi City kampýsymen qatar, aldaǵy ýaqytta ǵylym qalashyǵynda jańa úlken kampýs salý josparlanyp otyr.
Oqý úderisi tolyqtaı aǵylshyn tilinde júrgizilmek. Talapkerler UBT nátıjesimen qatar, aǵylshyn tilin meńgerý deńgeıi jáne jeke suhbat arqyly irikteledi. Sonymen birge, grant bólý máselesi de qarastyrylyp jatyr.
Almaty qalasy ákiminiń orynbasary Abzal Núkenov óz sózinde el stýdentteriniń úshten biri bilim alatyn megapolıs ǵylym men ınnovasııa ortalyǵy ekenin aıtyp, atalǵan ýnıversıtet shahardyń ınttellektýaldyq áleýetin arttyrýǵa oń yqpal etetinine senim bildirdi.
Q Education Group pen Ǵylym jáne joǵary bilim mınıstrliginiń qoldaýymen júzege asqan ýnıversıtet qos dıplomdy baǵdarlamalardy usynýdy josparlap otyr. Bul óz kezeginde túlekterge halyqaralyq eńbek naryǵynda básekege qabiletti bolýǵa múmkindik bermek.
S.Amanjolov ýnıversıteti ǵylymdy damytýǵa erekshe den qoıǵan
Sarapshylardyń pikirinshe, mundaı bastamalar eldiń ǵylymı áleýetin kúsheıtip, Ortalyq Azııadaǵy bilim berý kóshbasshylarynyń birine aınalýyna jol ashady.
ALMATY
