Foto: Qarjy mınıstrligi
Qytaıdyń Sıan qalasynda ótken jıynda ShYU-ǵa múshe jáne seriktes elderdiń ekonomıkalary men ınfraqurylymdyq jobalaryn qarjylandyrýdyń qosymsha tetikteri talqylandy. Basqosýǵa qarjy mınıstrleriniń orynbasarlary men uıym hatshylyǵynyń ókilderi qatysty. Qazaqstan atynan Qarjy vıse-mınıstri Dáýren Keńbeıl qatysyp, ShYU Damý bankin qurý jónindegi ekinshi konsýltatıvtik kezdesýde el ustanymyn jetkizdi.
Kezdesý barysynda bolashaq qarjy ınstıtýtynyń negizgi ólshemsharttary, qarjylandyrýdyń basym baǵyttary jáne kapıtaldandyrý tetikteri jan-jaqty qarastyryldy. Vıse-mınıstrdiń aıtýynsha, bul bank jańa býyn tehnologııalaryn qoldaýǵa baǵyttalǵan mańyzdy ınstıtýtqa aınalýǵa tıis.
Basym baǵyttardyń qatarynda jasandy ıntellekt, bıotehnologııa jobalary, sondaı-aq Qytaıdan transfertteletin ónerkásiptik jáne «jasyl» tehnologııalar bar. Sonymen birge táýelsiz qarjylandyrý, jergilikti valıýtalardy paıdalaný jáne balamaly qarjy quraldary arqyly jarǵylyq kapıtal qalyptastyrý máselelerine erekshe nazar aýdaryldy.
Qasym-Jomart Toqaev ShYU damý bankin qurý týraly bastamany qoldady
Kezdesý qorytyndysy boıynsha taraptar konsýltasııalardy jalǵastyrýǵa ýaǵdalasty. Kelesi jıyn 28-29 mamyr kúnderi Bishkek qalasynda ótedi.
Is-shara aıasynda Dáýren Keńbeıl Qytaı Halyq Respýblıkasy Qarjy mınıstriniń orynbasary Lıao Mınmen kezdesip, Qytaı naryǵynda panda-bondtardy shyǵarý rásimderi men Astana qalasynda sorǵy-súzgi stansasyn salý jobasyn qarjylandyrý máselelerin talqylady.
Jalpy, atalǵan bastamalardy júzege asyrý:
– Qazaqstannyń Qytaı naryǵyna jáne ShYU aıasyndaǵy jańa qarjy kózderine qoljetimdiligin keńeıtedi;
– ónerkásip, ınnovasııa jáne «jasyl» tehnologııalar salasyndaǵy jobalarǵa qosymsha múmkindik beredi;
– kapıtal kózderin ártaraptandyryp, ekonomıkanyń tehnologııalyq damýyn jedeldetýge yqpal etedi.
Qytaıdaǵy ShYU sammıtinde Toqaevtyń ustanymy nesimen erekshelendi?
