Olımpıada joldamasyn sarapqa salady

Astana mańyndaǵy Mıchýrıno eldi mekeninde taekvondodan Qazaqstan ulttyq quramasynyń oqý-jattyǵý jıyndary ótti. Bul jıyn komandanyń álem chempıonaty aldyndaǵy sońǵy daıyn­dyqtary. Jyl basynan beri ulttyq qurama Brazılııa, Koreıa men basqa da shetelderde sheberlikterin shyńdap, arnaıy daıyndyqtan ótti. Sonymen qosa, tájirıbeni arttyrý maqsatynda sportshylarymyz onshaqty halyqaralyq jarystarǵa qatysyp, 19 júldege ıe boldy. Sonyń nátıjesinde álem chempıonatynda óner kórsetetin 16 sportshy iriktep alyndy. Álem chempıonaty Dúnıejúzilik taekvondo federasııasynyń uıym­dastyrýymen eki jylda bir ret ótedi. Bıylǵy chempıonatta 2016 jyly Brazılııanyń Rıo-de-Janeıro qalasynda ótetin Olımpıadanyń joldamalary sarapqa salynady. Taekvondodan Qazaqstan ulttyq quramasynyń bas jattyqtyrýshysy Mustahım Qabdrashev óz sózinde sportshylarymyzdyń kóptegen týrnırlerge qatysyp, júldeli oryndarǵa ıe bolǵandaryn, bıylǵy álem chempıonatyna Nursultan Mamaı, Dúısenbaı Smaıyl, Erjan Abylqas, Rýslan Japparov, qyzdar arasynan Ferýza Ergeshova, Jazıra Saparbek, Anargúl Sabyrdyń óner kórsetetinin atap ótti. Jıynda Ońtústik Koreıadan kelgen taekvondo sheberi, Qazaqstan ulttyq quramasynyń jattyqtyrýshysy Iý Eng Djın Reseıdiń Chelıabi qala­synda ótetin álem chempıonatynda Olımpıadaǵa lısenzııa alyp, júl­deli oryndardan kórinemiz dep nyq senimmen aıtty. Bıylǵy chempıonatqa 150 elden 1 myńnan astam sportshy qatysyp, úzdikterdi anyqtaıtyn bolady. Aıjuldyz ERBOLATQYZY, L.N.Gýmılev atyndaǵy EUÝ stýdenti.