Qostanaı oblysynda taǵy bir qyzdyń óli denesi tabyldy

QOSTANAI. 14 mamyr. Qostanaı oblysyndada taǵy bir qyzdyń denesi ózen ańǵarynan óli kúıinde tabyldy. Bul týraly Alau.kz habarlady. Polısııaǵa Jetiqara qalasynyń turǵyny habarlasyp, 17 jastaǵy Nına Stafeevanyń 1 mamyrdan beri iz-tússiz ketkenin málimdegen. Onyń aıtýynsha, qyz dostarymen birge tabıǵat aıasynda demalyp, sonda túneıtin bolyp ketken eken. Erteńine basqalar aman-esen oralǵan da, olardyń qatarynda Nına bolmaǵan. Birge bolǵan qurby-qurdastary onyń tún ortasynda belgisiz bir jaqqa ketip qalyp, qaıta oralmaǵanyn aıtqan. Osynyń sońyn ala júrgizilgen izdestirý jumystarynyń nátıjesinde 12 mamyr kúni qyzdyń denesi Jelqýar ózeniniń boıynan tabylǵan. Teksere kelgende, onyń denesinde zorlyq belgileri baıqalmaǵan. Sot-medısınalyq saraptamasynyń qorytyndysy Nına Stafeevanyń sýǵa aǵyp ketkenin alǵa tartty. Qazir osy derekterge sáıkes «Kisi óltirý» baby boıynsha sotqa deıingi tergeý amaldary júrip jatyr. Qaza bolǵan qyzdyń denesin tolyq zertteý úshin jedel tergeý toby quryldy. Aıta ketý kerek, budan az ǵana ýaqyt buryn Qostanaı qalasynda osyǵan uqsas oqıǵan bolǵan edi. Atap aıtqanda, 4 mamyrda 17 jasar stýdent qyz Nurgúl Aǵybaevanyń óli denesi tabyldy. Polıseıler ony Tobyl ózeniniń arnasynan tapty. Oblystyq ishki ister departamentiniń baspasóz qyzmeti qyzdyń sýǵa tunshyǵyp ólgenin málimdedi. Teksere kelgende, onyń denesinen zorlyqtyń belgileri tabylmaǵan. Sondyqtan sýısıd bolýy múmkin degen uıǵarym jasaldy. Názıra Járimbetova. Derek, sýret: Alau.kz.