Atyraýda eksporttalǵan munaıdan 4 aıda 130 mlrd. teńge tabys tústi

ATYRAÝ. 14 mamyr. Atyraý oblysynan 4 aıda munaıdy syrtqy naryqqa eksporttaýdan memleket bıýdjetine 130 mlrd. teńge kóleminde kiris tústi. Bul týraly oblystyq memlekettik kiris departamentine qarasty energetıkalyq keden beketiniń basshysy Erlan Amenov málim etti. «2015 jyldyń 4 aıynda Atyraý oblysynan shıki munaıdy syrtqa shyǵarýdan memleket bıýdjetine 130 mlrd. teńge kóleminde kiris tústi. Bul kórsetkish ótken jyldyń dál osyndaı kezeńimen salystyrǵanda 35 paıyzǵa artty. «Qara altynnyń» eksporttaǵy úlesi 99,6 paıyzǵa deıin ulǵaıdy. Atyraý óńirinen óndiriletin shıki munaıdy iri kólemde satyp alýshylar qatarynda Italııa, Nıderlandy, Fransııa, jáne Túrkııa bar. Munaı eksporty qubyr jáne temirjol kóligi arqyly Novorossıısk, Taman, Ýst-Lýga jáne Prımorsk porttaryna jetkizilip, ári qaraı sý kóligimen satyp alýshy elderge tasymaldanady», – dedi energetıkalyq keden beketiniń basshysy. Qazirgi ýaqytta atalǵan keden beketinde memlekettik bıýdjetke asa kóp kólemde kiris túsiretin «Teńizshevroıl», «Anako», «Maten Petroleým» seriktestikteri men «KaspııNeft» aksıonerlik qoǵamy sekildi 40-qa jýyq kásiporyn rásimdelgen. Joldasbek Shópeǵul. Derek:egemen.kz. Sýret: Rahym Qoılybaev.