Soltústikqazaqstandyq boksshy Bolgarııadan jeńispen oraldy

PETROPAVL. 14 mamyr. Soltústikqazaqstandyq sport jankúıerleri jerlesi, belgili kásipqoı boksshy Janat Jaqııanovty temirjol vokzalynda zor qoshemetpen qarsy aldy. Bul týraly oblystyq dene shynyqtyrý jáne sport basqarmasynyń baspasóz qyzmeti habarlady. 31 jastaǵy egizdiń syńary Janat kásipqoı bokspen shuǵyldanǵannnan beri 26 kezdesý ótkizip, 25-inde jeńiske jetti. 18 qarsylasyn nokaýtqa jiberdi. Bolgarııada WBA International tıtýly úshin aıqasta jeńil salmaqta argentınalyq Hektor Rolando Gýsmanmen qolǵap túıistirip, altynshy raýndta gúrzi judyryǵymen sulatyp saldy.  Sóıtip, kezekti jeńisin toılady. Buǵan qosa onyń jeńil salmaq boıynsha EBU, WBC Eurasia Pacific Boxing Council belgileri boıynsha Eýropa chempıony ataqtary bar. WBC jáne WBA reıtıngteri boıynsha aldyńǵy oryndarda tur. «Qarsylasymnyń ekpindi shabýylynan-aq jarysqa jaqsy daıyndalǵanyn ańǵardym. Ekinshi raýndta kúshti soqqysyn ótkizip, nokdaýnǵa túsip qaldym. Esimdi tez jıyp, urys tizginin qolyma aldym. Osal tusyn taýyp, nokaýtqa túsirdim. Kúzge taman álem chempıony táji úshin sharshy alańǵa shyǵýdy josparlap otyrmyn. WBC belgisi boıynshaa japondyq Shınsýke Iаmanakı bolmasa brıtandyq Djeıms Makdonaldspen judyryqtasyp qalýym múmkin. Qazir promoýterler kelissiózder júrgizýde.  Jýyrda dúnıege kelgen qyzym Nuraıdyń janynda biraz bolyp, sosyn kezekti jattyǵýǵa kirisemin», deıdi WBA International belgisiniń jeńimpazy Janat Jaqııanov. О́mir Esqalı. Derek, sýret: Soltústik Qazaqstan oblystyq dene shynyqtyrý jáne sport basqarmasy.