«Joǵary mártebeli Prezıdent myrza, qadirli baýyrym, О́zińizben Qazaqstannyń elordasynda júzdeskenime óte qýanyshtymyn. Eń aldymen, meniń shaqyrýymdy qabyl alyp, Qazaqstanǵa memlekettik saparmen kelgenińiz úshin shyn júrekten rızashylyǵymdy bildirgim keledi. Saparyńyzdyń mán-maǵynasy erekshe, óte joǵary dep aıtsaq artyq bolmaıdy. Sebebi bul, shyn máninde, tarıhı oqıǵa. Bul sapar elderimizdiń yntymaqtastyǵyna úlken serpin beretinine eshqandaı kúmán joq. Eki el arasynda tek qana dostyq, baýyrlastyq, máńgilik seriktestik qarym-qatynas qalyptasqan. Aramyzda eshqandaı túıtkil nemese sheshilmegen másele joq. Qosh keldińiz!», dedi Qasym-Jomart Toqaev.
Táýelsizdik saraıynda Rejep Taııp Erdoǵandy saltanatty qarsy alý rásimi ótti
Osy oraıda, Memleket basshysy byltyr Ankaraǵa jasaǵan resmı saparyn yqylaspen eske aldy.
«Biz Ankarada Strategııalyq yntymaqtastyq jónindegi komıssııanyń besinshi otyrysyn ótkizdik. О́te mańyzdy sheshimderge qol jetkizdik. Búgin Keńestiń altynshy otyrysy bolady. Aýqymdy bıznes forým ótedi. О́zińizben birge Astanaǵa úlken delegasııa keldi. Sondyqtan saparyńyz oıdaǵydaı ótedi dep oılaımyz. Osylaısha, ózara yntymaqtastyǵymyzdyń jarqyn bolashaǵyna zor qadam jasaımyz», dedi Qazaqstan Prezıdenti.
Rejep Taııp Erdoǵan baýyrlas qazaq eliniń kórsetken qurmetine alǵys aıtty.
«Eń áýeli, baýyrymyzdyń atajurtqa arnaıy shaqyrǵanyna rızashylyǵymdy bildirgim keledi. Bizge aıryqsha qonaqjaılyq tanytyp otyrsyzdar. Qazaq eliniń shekarasynan ótkennen qaptaldasa ushqan ushaqtarmen qarsy alyp, meniń delegasııama úlken qurmet kórsettińizder. Bul bizdi erekshe qýantty. Árıne, muny umytpaımyz. Búgingi sapar baýyrlas halyqtardyń yntymaǵyn arttyrýǵa zor septigin tıgizedi dep senemin», dedi Túrkııa Prezıdenti.
Eske sala keteıik, Rejep Taııp Erdoǵan Qazaqstanǵa memlekettik saparmen 13 mamyr keshinde keldi. Ony áýejaıda Qasym-Jomart Toqaev ózi qarsy aldy.
