Forýmǵa 4 myńnan astam kásipker men 200-den asa jetekshi kompanııa ókilderi qatysady dep josparlanyp otyr. Is-shara barysynda tehnologııa, menedjment, geosaıasat jáne bıznesti damytý máseleleri talqylanady.
Baǵdarlamaǵa álemdik deńgeıdegi sarapshylar shaqyrylǵan. Olardyń qatarynda Eýropalyq komıssııanyń burynǵy tóraǵasy Joze Manýel Barrozý, sıfrlyq ekonomıka sarapshysy Don Tepskot, Siri júıesiniń negizin qalaýshylardyń biri Lıýk Djýlııa, tanymal jazýshy Djon Greı jáne Glovo kompanııasynyń negizin qalaýshy Sasha Mısho bar.
Forýmnyń negizgi maqsaty – kásipkerlerge tájirıbe almasyp, jańa seriktester tabýǵa múmkindik beretin ashyq dıalog alańyn qalyptastyrý. Is-sharaǵa Qazaqstannyń iri bıznes ókilderi de qatysady. Olardyń arasynda Aıdyn Rahymbaev, Eldar Ábdirazaqov jáne Armanjan Baıtasov bar.
«Forýmda álemdik deńgeıdegi sarapshylar men elimizdiń myqty kóshbasshylary oı bólisedi. Ásirese, Joze Manýel Barrozýdyń qatysýy biz úshin erekshe mańyzdy. Ol – on jyl boıy Eýropalyq komıssııany basqarǵan jáne Portýgalııanyń Premer-mınıstri bolǵan álemdik deńgeıdegi saıasatker. Mundaı sarapshylarmen dıalog qurý jahandyq geosaıası jaǵdaıdy taldaýǵa jáne otandyq bıznestiń álemdik ekonomıkadan óz ornyn tabýyna múmkindik beredi. Onyń halyqaralyq ınstıtýttardy basqarýdaǵy tájirıbesi bizdiń jobalardy Qazaqstan shekarasynan tys jerlerge shyǵarý úshin jol ashady», deıdi forým negizin qalaýshy ári bas dırektor Maqsat Qurbenov.
Uıymdastyrýshylardyń aıtýynsha, forýmda kompanııalardy halyqaralyq naryqqa shyǵarý, bıznesti masshtabtaý jáne jahandyq ekonomıkalyq ózgeristerge beıimdelý joldary qarastyrylady.
«Álem tez ózgerip jatyr, sondyqtan otandyq bıznes halyqaralyq arenada batyl áreket etýge tıis. Bizdiń kásipkerlerdiń jahandyq deńgeıdegi kompanııalar qurý úshin áleýeti de, jigeri de jetedi dep senemin. Biz New Vision Forum-dy árbir kásipker úırenshikti sheńberden shyǵyp, óz isine jańa qyrynan qaraı alatyn erkin keńistik retinde qalyptastyrdyq», dep atap ótti Kusto Group qosalqy quryltaıshysy, forým tóraǵasy Qanat Kópbaev.
Bıylǵy forýmǵa 5 myńnan astam adam qatysady dep kútiledi. Qatysýshylar úshin bıznes-keıster, netvorkıng alańdary, tehnologııalyq kórmeler men jabyq sessııalar uıymdastyrylady. Is-sharany Nobel Fest uıymdastyryp otyr. Forým Almaty qalasynyń ákimdigi qoldaýymen ótedi.
