Mańǵystaý óńirinde qyzyl kitapqa engen qustar qyrylýda

ASTANA. 14 mamyr. Elimizdegi elektr baǵandarynyń basym bóligi qustardy qorǵaý qondyrǵylarymen jabdyqtalmaǵan. Sonyń saldarynan qarasy sırep ketken qustardyń joıylý qaýpi tónip tur. Bul týraly 24.kz habarlady. Mańǵystaý dalasyna zertteý júrgizgen qazaqstandyq jáne reseılik ǵalymdar qyzyl kitapqa engen qustardyń joıylyp bitý qaýpi tónip tur dep dabyl qaǵýda. Ajal qushqan qustardan tabıǵatqa 18 mıllıon teńgege jýyq shyǵyn kelgen. Mańǵystaý jazyǵyn dala búrkiti, qaraqus, ıtelgi, lashyn, úki sekildi sırek kezdesetin qustar mekendeıdi. Olardyń basym bóligi qyzyl kitapqa engizilgen. Alaıda sońǵy jyldary osy baǵaly qustar elektr jelilerine túsip, jappaı qyrylýda. Buǵan arnaıy zertteý júrgizgen Qazaqstan men Reseı ǵalymdary kóz jetkizip otyr. Zertteýshiler jazyq dalany aralaý barysynda baǵanalardyń túbinde jatqan 123 qustyń óleksesin tapqan. Tabıǵatqa kelgen shyǵyn 17 mıllıon teńgeden asyp jyǵylady. Ornıtolog Mark Pestov: «Biz qyzyl kitapqa engen úkiniń óleksesin taptyq. Qus elektr baǵanyna qonǵan kezde qysqa tuıyqtalý bolyp, birden jerge qulaǵan. Qazaqstannyń zańy boıynsha úkini aýlaǵandarǵa 200 aılyq eseptik kórsetkish kóleminde aıyppul salynady. Al biz mundaı baǵaly qustardy ár shaqyrym saıyn kezdestirip otyrmyz. Sonyń ishinde, toqqa túsken úlken jyrtqysh qustardyń óli denesi kóp tabyldy» –.deıdi. Aıta keteıik, ekologtar elektr taratý mekemeleriniń basshylyǵymen atalǵan máseleni birigip sheshýge nıetti. Olardyń paıymdaýynsha jeliler talapqa saı jabdyqtalmasa, qyzyl kitapqa engen qustar ańshylardyń qolynan emes, elektr baǵandarynyń toǵyna túsip ajal qusha bermek. Talǵat Raıymbek. Derek, sýret: 24.kz.