Batys Qazaqstanda jyl basynan beri avtokólik sany kúrt kóbeıdi

ORAL. 14 mamyr. Batys Qazaqstan oblysynda 2015 jyldyń birinshi toqsanynda 192 650 avtomobıl tirkelgen. Oblysta kóliktiń kúrt kóbeıýin jol saqshylary Reseı rýbli baǵamynyń tómendeýimen jáne bizdiń azamattardyń satyp alý qabiletiniń ósýimen baılanystyryp otyr. Bul týraly Batys Qazaqstan oblysynyń ishki ister departamentine silteme jasap, egemen.kz tilshisi habarlady. «Tek sońǵy úsh jylda Oral óńirindegi avtomobılderdiń sany 50 myńǵa artty. Mysaly, 2014 jyly oblysta 185 myń avtokólik tirkelse, tek 2015 jyldyń I toqsanynyń ózinde onyń sany 192 myńnan asyp tústi», – dep málimdedi Batys Qazaqstan oblysy ishki ister departamenti bastyǵynyń orynbasary Saǵat Mádıev. Sonymen birge ol kedendik odaq qyzmetiniń jańa deńgeıge kóterilýine oraı tranzıttik kólikter shoǵyry da arta túskenin aıtty. Máselen, 2014 jyldyń úsh aıynda Aqjaıyq aımaǵy arqyly 248 myń avtomobıl ótkizilse, 2015 jyly onyń sany 280 myńǵa jetken. «Respýblıkalyq mańyzy bar joldarda avtokólik tasqynynyń kóbeıýi jol-kólik oqıǵasynyń jıileýine áser etpeı qoımaıdy», – deıdi Saǵat Mádıev. Temir Qusaıyn. Derek: egemen.kz. Sýret: kapital.kz.