Bıyl kitaphananyń qurylǵanyna 65 jyl tolyp otyr. Mereıtoı qarsańynda jańa ǵımarattyń ashylýyn jergilikti jurt oblys rýhanııaty úshin mańyzdy oqıǵa retinde baǵalady. Ashylý saltanatynda oblys ákimi Nuralhan Kósherov kitaphananyń qoǵam úshin mańyzyna toqtaldy. «Kitaphana – tek kitap saqtalatyn oryn emes. Bul – ulttyń rýhanı qazynasy ári tárbıeniń altyn besigi. Memleket basshysy Qasym-Jomart Toqaev Ulttyq quryltaı otyrysynda: «Tek kitap oqıtyn ult qana shyn máninde ıntelektýaldy qoǵam qura alady. Bul – eldiń rýhanı damýynyń negizi» dep, kitaphana salasynyń qoǵam ómirindegi mańyzyn aıshyqtap bergen bolatyn. Ásirese jastardyń kitapqa degen qyzyǵýshylyǵyn oıatyp, durys baǵytta tárbıeleý – bolashaqqa jasalǵan mańyzdy ınvestısııa bolyp sanalady. Búgingi is-shara – osy baǵyttaǵy jumystardyń alǵysharty retinde júzege asýda. Osydan biraz ýaqyt buryn kitaphananyń eski ǵımaratynyń jaı-kúıin kórip, ony zaman talabyna saı jańartyp, balalar úshin zamanaýı ıntellektýaldy ortalyqqa aınaldyrý týraly arnaıy bastama kótergen edim. Osy ıdeıany biraýyzdan qoldap, balalarymyzǵa ǵajaıyp bilim ordasyn syılaýǵa múmkindik týǵyzǵan oblystyq máslıhat depýtattary men basqa da azamattarǵa shynaıy rızashylyǵymdy bildiremin», dedi Nuralhan Kósherov.
Jańa ǵımaratta balalardyń bilimin shyńdap, bos ýaqytyn tıimdi ótkizýine barlyq jaǵdaı jasalǵan. Kitaphana qorynda 226 403 kitap saqtalǵan, álemdik klassıka, zamanaýı balalar ádebıeti jáne elektrondy resýrstardyń barlyq múmkindikteri qamtylǵan. Jobanyń jalpy quny – 481,336 mln teńge. Ǵımarattyń jalpy aýmaǵy – 1065,3 sharshy metr. Kitaphana bir mezette 100 oqyrmanǵa qyzmet kórsetýge qaýqarly. Munda 50-den astam maman eńbek etedi.
Aıta ketelik, búginde Túrkistan oblysynda jalpy kitap qory 6 mıllıonnan asatyn 390 kitaphana halyqqa qyzmet kórsetedi. О́tken jyly oblysta kitaphanalarmen qatar 6 mádenıet úıi paıdalanýǵa berilse, bıyl taǵy 10 mádenı nysannyń qurylys jumystary qarqyndy júrip jatyr. Atalǵan nysandar jyl sońyna deıin el ıgiligine beriledi.
TÚRKISTAN
