Jetinshi týrda blısten álem birinshiliginiń qola júldegeri, qytaılyq Chjý Szınerden basym túsken Bıbisara kelesi kezeńde Úndi eliniń ókili Dıvıa Deshmýkhpen sheberlik baıqasty. Bul básekede de qazaq shahmatshysy jeńiske jetip, jarys kestesinde ózge qarsylastarynan edáýir ozyp ketti. Onyń qorjynynda qazir 15,5 upaı bar. Ekinshi oryndaǵy ýkraınalyq Anna Mýzychýktyń Asaýbaevadan 4,5 upaıy kem. Úshinshi, tórtinshi oryndy Dıvıa Deshmýkh pen Chjý Szıner ózara bólisip tur. Olardyń árqaısysynda 10 upaıdan bar. Odan keıingi satylarǵa Szıýı Venszıýn (9 upaı) men Hampı Konerý (8 upaı) jaıǵasty. Toǵyzynshy týrda jerlesimiz Mýzychýkqa qarsy oınaıdy. Osy básekede bas júldeniń taǵdyry sheshiledi.
Skandınavııa túbegindegi týrnır ótip jatqan tusta FIDE reıtıngi qaıta jańartylǵany jaıynda da aıta keteıik. Álemniń eń úzdik shahmatshylary tiziminde B.Asaýbaeva (2537 upaı) tórtinshi orynǵa kóterildi. Onyń aldynda Qytaıdyń úsh myqtysy – Hoý Ifan (2596), Leı Tınsze (2566), Szıýı Venszıýn (2560). Buryn-sońdy elimizdiń birde-bir shahmatshysy mundaı deńgeıge jetken emes. Sol sebepti de buny tarıhı oqıǵa dep baǵalaǵan jón. Al biz Bıbisaradan budan da zor nátıje kútemiz. Sondaı-aq álemdik reıtıngtegi TOP-10 oıynshynyń qataryna ýkraınalyq Aleksandra Gorıachkına (2536), qytaılyq Chjý Szıner (2535) men Tan Chjýnı (2517), úndistandyq Hampı Konerý (2529), ýkraınalyq Anna Mýzychýk (2523), reseılik Katerına Lagno (2506) syndy grossmeısterler endi.
