Sport • Búgin, 09:02

Jarys kúndeligi

3 mın

oqý úshin

Túrkistanda eskek esýden jastar arasyndaǵy Azııa chempıonaty bastaldy. 7 maýsymǵa deıin sozylatyn jarysta Dinmuhamed Shynqojaev, Dmıtrıı Holmogorov, Egor Krasnonos, Denıs Klenın, Mıhaıl Zatolokka, Dmıtrıı Ladıýkov, Edýard Iаrlykov, Gleb Ýdarsev, Anatolıı Rýsakov, Evgenıı Rýsakov, Stella Sýhanova (baıdarka), Sultan Sharapıev, Polat Tórebekov, Vladıslav Rýdenko, Iýrıı Gorobov, Tatıana Gladkova, Valentına Trapeznıkova, Elızaveta Masıakına, Marııa Brovkova, Marııa Karmanova, Ýlıana Kıselıova, Rýfına Ysqaqova (kanoe) syndy sportshylar el namysyn qorǵaıdy.

Ǵalym SÚLEIMEN

Elimizdiń jeńil atletteri túrli halyqaralyq týrnırlerde úsh medal jeńip aldy. Kıprdiń Lımasolynda bıiktikke sekirýshi Elızaveta Matveeva kúmis alsa, Polshanyń Belostogynda Krıstına Ovchınnıkova qola medal enshiledi. Syryqpen sekirýshi Polına Ivanova Ońtústik Koreıanyń Pýsanynda ekinshi orynǵa taban tiredi.

Shaıbaly hokkeıden 2026 jyly Germanııada ótetin álem chempıonatynyń elıtalyq dıvızıonynda elimizdiń ulttyq quramasy V tobynda óner kórsetedi. Qarsylastarymyz – Kanada, AQSh, Chehııa, Germanııa, Danııa, Norvegııa, Italııa. A tobynda Shveısarııa, Fınlıandııa, Shvesııa, Slovakııa, Latvııa, Aýstrııa, Slovenııa, Ýkraına saıysqa túsedi.

Reseı Premer-lıgasynda Groznyıdyń «Ahmad» klýbynyń sapynda oınaıtyn elimizdiń fýtbolshysy Maksım Samorodovqa birqatar komandanyń kózi túsip júr. Olardyń qatarynda Máskeýdiń «Spartagy» men «Lokomotıvi», «Krasnodar» bar. О́tken maýsymda 34 ret jasyl alańǵa shyqqan 23 jastaǵy shabýylshy bes ret mergendik tanytyp, 10 márte nátıjeli pas berdi.

Aýyr atletıkadan elimizdiń ulttyq quramasynyń bas bapkeri Dáýren Bekmuhanbetov aldaǵy josparlarymen bólisti. Búginde otandyq ziltemirshiler О́zbekstanda oqý-jattyǵý jıynyn ótkizip júr. Jıyn aıaqtalǵan soń, 12 maýsymda sportshylarymyz Túrkııaǵa attanady. Anadoly elinde bıyl kúzde Japonııada alaýy tutanatyn Azııa oıyndaryna qatysatyndar anyqtalady. Odan keıin lısenzııalyq álem chempıonaty bar. Oǵan da elimizdiń eń myqty atletteri qatysady. Sondaı-aq olar jyl sońynda Olımpııa oıyndarynyń joldamalary sarapqa salynatyn taǵy bir jarysta kúsh synasýdy josparlap otyr.

«Forbes» jýrnaly eń baı fýtbol klýbtarynyń reıtıngin jarııalady. Bul tizimde Madrıdtiń «Realy» jeke-dara kósh bastap tur. Qazirgi kezde koroldik klýb 9,5 mlrd AQSh dollaryna baǵalanyp otyr. Ekinshi, úshinshi oryndarda Ispanııanyń «Barselonasy» (7,5 mlrd) men Anglııanyń «Manchester Iýnaıtedi» (7,2). Sondaı-aq TOP-10-dyqtyń qatarynda Lıverpýl» (6,2), PSJ (5,8), «Bavarııa» (5,7), «Manchester Sıtı» (5,5), «Arsenal» (5,4), «Chelsı» (4,2), «Tottenhem» (3 mlrd) sekildi alpaýyttar bar.

Daıyndaǵan –
Ǵalym SÚLEIMEN,
«Egemen Qazaqstan»