Foto: Ashyq derekkóz
Qarjylyq monıtorıng agenttiginiń (QMA) baspasóz qyzmetiniń málimdeýinshe, top quramynda 9 adam bolǵan. Zańsyz shemany júzege asyrý úshin olar munaı ónimderin satyp alý, qujat rásimdeý jáne eksporttaý maqsatynda 12 zańdy tulǵany tirkegen.
Benzınniń shyǵý tegin zańdastyrý jáne ony shetelge shyǵarý úshin kúdiktiler «Qara Maı OıL» JShS men «Petro Bazis» JShS shaǵyn munaı óńdeý zaýyttaryn paıdalanǵan.
«Qujat júzinde kásiporyndar AI-92 benzınin jeńil dıstıllıatpen nemese eritkishpen aralastyrý qyzmetin kórsetken. Alaıda is júzinde olardyń qyzmeti benzındi eshqandaı tehnologııalyq óńdeýsiz temirjol sısternalaryna quıýmen ǵana shektelgen», delingen habarlamada.
Energetıka mınıstrligi benzın men gaz baǵasyna qatysty shaǵymdardy qabyldaıtyn jeli ashty
QMA málimetinshe, keıin jalǵan qujattar rásimdelip, olardyń negizinde benzın aromatty kómirsýtekter qospasy, eritkishter nemese jeńil kómirsýtekter qospasy retinde deklarasııalanǵan.
Nátıjesinde avtokólik benzıni munaı-hımııa ónimi retinde kórsetilip, Qyrǵyz Respýblıkasyna zańsyz shyǵarylǵan. Bul áreketter eldiń ishki naryǵynda munaı ónimderiniń tapshylyǵy baıqalǵan kezeńde de júzege asyrylǵan.
«Zańsyz eksporttalǵan benzın kólemi 190 myń tonnadan asyp, qylmystyq toptyń kóleńkeli aınalymy 37,2 mlrd teńgeden asqan. Jedel-izdestirý is-sharalary barysynda «Túrksib» stansııasynda Qyrǵyz Respýblıkasyna jóneltilmek bolǵan shamamen 500 tonna zańsyz benzın tıelgen 8 temirjol sısternasy ustaldy. Quny 138 mln teńge bolatyn tárkilengen benzın memleket kirisine ótkizildi», delingen habarlamada.
Qylmystyq is sotqa joldandy.
Qazaqstan Respýblıkasy QPK-niń 201-babyna sáıkes ózge aqparat jarııalaýǵa jatpaıdy.
