TÚRKSOI Bas hatshylyǵynyń ǵımaratynda bastalǵan baǵdarlama aıasynda aldymen Ahmet Jubanovtyń ómiri men shyǵarmashylyǵyna arnalǵan «Ahmet Jubanov: kúıge aınalǵan ómir» atty kórmeniń ashylý rásimi ótti. Saltanatty rásimde sóz sóılegen TÚRKSOI Bas hatshysynyń orynbasary Saııt Iýsýf kompozıtor Ahmet Jubanovtyń Qazaqstannyń ǵana emes, kúlli túrki áleminiń ortaq mádenı murasynyń kórnekti ókilderiniń biri ekenin atap ótti. Uly dala únin notaǵa túsirip, ulttyq oı-sanamyzdy óner tilimen keleshek urpaqqa amanattaǵan tulǵadan qalǵan teńdessiz murany birge ulyqtap, tamyry tereń mádenı baılanystardy jańǵyrtý TÚRKSOI úshin úlken mártebe ekenin jetkizdi. Kórmeden keıin Jubanovtyń ómir joly men ónerdegi órisin baıandaıtyn arnaıy derekti fılm kórermen nazaryna usynyldy.
Qazaqstan men Túrkııanyń ǵylym jáne mádenıet salasy ókilderiniń qatysýymen ótken halyqaralyq dóńgelek ústel Ahmet Jubanovtyń túrki dúnıesiniń mýzyka mádenıetine qosqan úlesine arnaldy.
Túrkııanyń TÚRKSOI-daǵy ókili Kýtalmysh Iаlchyn Ahmet Jubanovtyń halyq mýzykasyn tek óner týyndysy retinde ǵana emes, ulttyń rýhanı álemi men mádenı bolmysy dep baǵalaǵanyn bildirdi. Sondaı-aq kompozıtor murasy kúlli túrki áleminiń ortaq rýhanı baılyǵy ekenin basa aıtty. Al Ankara Mýzyka jáne beıneleý óneri ýnıversıtetiniń rektory Erhan О́zden Túrkııada bilim alyp jatqan túrki dúnıesi jastarynyń sany artyp kele jatqanyna nazar aýdaryp, mýzyka men ónerdiń adamdardy ótkendi bolashaqqa jalǵaıtyn mańyzdy dáneker ekenin, mundaı is-sharalardyń ortaq qundylyqtardy bekemdeı túsetinin jetkizdi. Qazaqstannyń Ankaradaǵy elshiliginiń keńesshisi Aıan Qolbaı óshpes mádenı muranyń tarıhı mánine toqtaldy.
«Ulttyq mádenıetimizdiń janashyry ári qazaq mýzyka tarıhynyń sónbes juldyzy Ahmet Jubanovtyń shyǵarmalary shekaradan asyp, baýyrlas elderimiz arasynda altyn kópir bolýyn jalǵastyryp keledi. Onyń qaldyrǵan teńdessiz mádenı murasy túrki áleminiń ortaq baılyǵy retinde ǵasyrlar boıy jasaı beredi», dedi ol.
Jıynda Qazaqstannan barǵan delegasııa ókilderi de mazmundy baıandama jasap, ulttyq mýzyka tarıhynan syr shertti. Mádenıet jáne aqparat mınıstrliginiń ókili Dınara Sabırova kóptegen ulttyq mýzyka tarıhynda halyqtyq dástúr men kásibı óneri arasynda altyn kópir ornatqan tulǵanyń biri Ahmet Jubanov ekenin atap ótti. Al Ulttyq ortalyq mýzeı dırektory Serjan Sarov mýzykany halyq janynyń úni dep baǵalap, Jubanovtyń búkil sanaly ǵumyryn qazaq mýzykasyn zertteýge, júıeleýge, ony álemge tanytýǵa arnaǵanyn jetkizdi.
Mereıtoılyq is-sharalar legi Ankara Mýzyka jáne beıneleý óneri ýnıversıtetiniń Muzaffer Sarysózen atyndaǵy amfıteatrynda uıymdastyrylǵan konserttik baǵdarlamamen jalǵasty. Qurmanǵazy atyndaǵy Qazaq ulttyq halyq aspaptar orkestri qalanyń ónersúıer qaýymyna áserli kesh syılady. Sahnada Qurmanǵazynyń «Adaı», Súgirdiń «Yńǵaı tók», Jamaǵat Temirǵalıevtiń «Baqtybaıdyń áýeni», basqa da kúıler oryndaldy.
