Foto: Ekologııa jáne tabıǵı resýrstar mınıstrligi
Atalyq jolbarysqa Amýr, analyq jolbarysqa Úmit esimi berildi. Al olardyń kúshikteri Turan jáne Ýssýrı dep ataldy.
Qazaqstanǵa jetkizilgennen keıin janýarlar «Ile-Balqash» memlekettik tabıǵı rezervatynyń arnaıy daıyndalǵan volerlerine ornalastyryldy. Qazirgi ýaqytta olar beıimdelý kezeńinen ótip jatyr.
Mamandardyń sózinshe, jolbarystar jańa tabıǵı-klımattyq jaǵdaılarǵa sátti beıimdelip jatyr.
«Aldaǵy ýaqytta beıimdelý kezeńi men janýarlardyń jaǵdaıyn keshendi baǵalaý aıaqtalǵannan keıin olardy tabıǵı ortaǵa jiberýge daıyndyq júrgiziledi. Jiberý aldynda jolbarystar spýtnıktik qarǵybaýlarmen jabdyqtalady. Bul olardyń qozǵalysyn turaqty baqylaýǵa jáne mamandardyń jedel súıemeldeýin qamtamasyz etýge múmkindik beredi», delingen Ekologııa jáne tabıǵı resýrstar mınıstrliginiń habarlamasynda.
Eske salaıyq, 27 mamyrda Reseı Prezıdenti Vladımır Pýtın Qazaqstanǵa memlekettik saparmen keldi. Sapar aıasynda Qazaqstanǵa tórt Amýr jolbarysynyń ákelinýin Qasym-Jomart Toqaev aıtýly oqıǵa dep atady.
