Merekelik is-shara at shaptyryp, án saldyryp qana atap ótpedi, «Rıdder tarıhı aspektiler turǵysynan» atty respýblıkalyq ǵylymı-tájirıbelik konferensııamen bastaldy. Dóńgelek ústelde bas qosqandar qalanyń qalyptasý tarıhyn, óńirdiń áleýmettik-ekonomıkalyq damýyndaǵy rólin, tarıhı murasyn talqylady. Artynsha «Rıdder – kendi Altaıdyń keremeti» atty oblystyq aqyndar aıtysy ótip, aımaqtyń tanymal aıtyskerleri sóz saıysyna tústi. Qala turǵyndary aıtysqa ábden shóldegen be, mádenıet saraıynyń zaly lyq toldy.
Ertesinde qalalyq ıppodromda Rıdderdiń II ulttyq «Atamura» oıyndary uıymdastyryldy. Jınalǵandar kókpar, top báıge, aýdaryspaq, qazaqsha kúres, arqan tartý, sadaq atý jáne «Tolaǵaı» saıystarynan synǵa tústi.
«Ulttyq sport túrinen ótip jatqan saıystardy halyq kútip júrip kóredi. Biz de tas kóterip, arba súırep jarystyq. Qalanyń 240 jyldyǵy joǵary deńgeıde toılanyp jatyr. Rıdder qalasy kórkeıe bersin», deıdi bilek kúshi sport túrinen álem chempıony Temirlan Kenjehanov.
Sondaı-aq jınalǵan jurtshylyq áýe sharymen kókke kóterilip, qalany bıikten tamashalady. Mereke aýmaǵynda saýda-sattyq qyzyp, túrli syılyq oınatyldy. Mereıli mereke Respýblıka alańyndaǵy aýqymdy konsertpen qorytyndylandy. О́ńir basshysy Nurymbet Saqtaǵanov is-sharalarǵa qatysyp, turǵyndarǵa jyly lebizin
bildirdi.
«Tarıhy tereń Rıdder elimizdiń ındýstrııalyq damýyna zor úles qosyp, eńbek pen erliktiń, birlik pen jasampazdyqtyń úlgisin kórsetip keledi. Qala jyl ótken saıyn jańaryp, áleýmettik nysandar salynyp, ınfraqurylymy damyp, turǵyndardyń ómir súrý sapasy jaqsaryp keledi. Bilim salasynda mańyzdy jobalar júzege asyrylyp jatyr. Atap aıtqanda, qazaq tilinde oqytatyn «Shańyraq» mektebiniń qurylysy aıaqtalýǵa jaqyn, №11 jáne №12 mektepterdiń jańa ǵımarattary paıdalanýǵa berildi. Eleýli oqıǵalardyń biri – 200 tósektik orny bar zamanaýı kópsalaly aýrýhana kesheni men bir aýysymda 500 adamdy qabyldaıtyn emhananyń qurylysy boldy. Qalamyzdyń abyroıy artyp, mártebesi bıiktep, óńirimiz qarqyndy damı bersin», dedi N.Saqtaǵanov.
Sodan soń sahnada elimizdiń óner juldyzdary men jergilikti shyǵarmashylyq ujymdar óner kórsetip, turǵyndarǵa kóterińki kóńil kúı syılady.
Shyǵys Qazaqstan oblysy,
Rıdder qalasy
