Amerıkalyq dańqty mýzykant Bı Bı Kıng qaıtys boldy

ALMATY. 15 mamyr. Las-Vegas shaharynda ataqty amerıkalyq mýzykant – «blıýz patshasy» Bı Bı Kıng (B.B. King) 89 jasynda dúnıeden ótti. Bul týraly Associated Press habarlady. Mýzykanttyń advokaty Brent Braısonnyń málimdeýinshe daryn ıesi óz úıinde uıqydan turmaǵan. Gıtara sheberi sońǵy ret 2015 jyldyń 6 sáýirinde organızmindegi qantynyń jedel kóterilýine baılanysty aýrýhanaǵa túsken. Qant dıabeti keselimen mýzykant 20 jyldan beri aýyrady. Alaıda, sáýirdegi keseldiń qozýy eki-aq kúnge sozylǵan. Búkil álemniń mýzyka súıer qaýymy Bı Bı Kıngti (shyn esimi – Riley B. King) «Gremmı» syılyǵyn áldeneshe ret ıemdengen, sheber blıýz oryndaýshy ári tanymal avtor retinde jaqsy biledi. Osy arada onyń 2006 jyly densaýlyǵyna baılanysty Eýorpaǵa gastrolldik saparyn toqtatqany da eske túsedi. Aıta keteıik, amerıkalyq Rolling Stone jýrnaly 2011jyldyń qorytyndysy boıynsha Bı Bı Kıngti dúnıejúziniń eń belgili 100 gıtara oryndaýshylarynyń ishinde 6-shy qatarǵa qoıǵan bolatyn. Talǵat Súıinbaı. Sýret, derek: AR.