Oralda kópqabatty úıdiń eki páterdi bólip turǵan qabyrǵasy qulap qaldy

ORAL. 15 mamyr. Batys Qazaqstan oblysynyń ortalyǵy – Oralda memlekettik baǵdarlama boıynsha salynǵan kóp qabatty úıde eki páterdiń arasyn bólip turǵan qabyrǵa qulap qaldy. Saldarynan áıel adam men onyń sábıi zardap shekti. Bul týraly uralskweek.kz saıtyna silteme jasap, egemen.kz tilshisi habarlady. Oqıǵa keshe keshkisin Jambyl kóshesindegi 10 qabatty úıde bolǵan. Qabyrǵasy qulaǵan páterler 8-qabatta ornalasqan. Zardap shekken otbasy tilshilermen kezdesýden bas tartty. Sondaı-aq, úıdi tekserýge kelgen Turǵyn úı qurylys jınaq bankiniń qyzmetkerleri de BAQ ókilderine túsinikteme bergen joq. Olar bul úıdiń atalǵan bank arqyly berilgenin ǵana aıtty. Qazirgi tańda apattyń neden bolǵany belgisiz. Kórshileriniń aıtýynsha, qatty daýys estilgen. Al qabyrǵanyń qulaǵanyn olar keıin bilgen. Tótenshe jaǵdaılar departamenti oqıǵanyń anyq-qanyǵyna kóz jetkizgen soń naqty málimetter beretinderin aıtty. Ázirge keleńsiz jaıt bolǵan páterde qaıta josparlaý jumystary júrgizilgendigi týraly aqparat joq. Temir Qusaıyn. Derek: egemen.kz. Sýret: mgorod.kz.