Chempıondar lıgasy. Irikteý týrnıriniń pleı-off básekesi bastaldy

ASTANA. 19 tamyz. О́tken túnde ÝEFA Chempıondar lıgasy irikteý týrnıriniń pleı-off básekesi bastaldy. Sonyń sheńberinde oınalǵan bes oıynnyń nátıjesi belgili. Olardyń arasynda «Astana» – APOEL matchy da bar. Bul týraly egemen.kz habarlady. Elordalyqtar óz alańynda ótkizgen alǵashqy kezdesýde Kıprden kelgen klýbty 1:0 esebimen jeńdi. Jalǵyz goldyń avtory – Baýyrjan Jolshıev. Ol oıynnyń 13-mınýtynda baspen qarsylastar qaqpasyn dál kózdegen bolatyn. Endi 26 tamyzda qos komanda APOEL-diń alańynda qarymta kezdesý ótkizedi. Chempıondar lıgasynyń toptyq saıysyna joldama alý úshin «Astanaǵa» Kıprde teń oınasa da jetkilikti. Qalǵan tórt tartystyń nátıjeleri tómendegideı: BATE (Borısov, Belarýs) – «Partızan» (Belgrad, Serbııa) 1:0 Gol: Mıhaıl Gordeıchýk 75. «Lasıo» (Rım, Italııa) – «Baıer» (Leverkýzen, Germanııa) 1:0 (0:0) Gol: Balde Keıta 77. «Manchester Iýnaıted» (Manchester, Anglııa) – «Brıýgge» (Brıýgge, Belgııa) 3:1 (2:1) Goldar: Memfıs Depaı 13, 43, Marýan Fellaını 90+4 – Maıkl Kerrık 8, avtogol. «Sportıng» (Lıssabon, Portýgalııa) – SSKA (Máskeý, Reseı) 2:1 (1:1) Goldar: Teofılo Gýterres 12, Islam Slımanı 82 – Seıdý Dýmbııa 40. Bul komandalardyń da qarymta kezdesýleri 26 tamyzda ótetinin aıta keteıik. Sonymen qatar, búgin túnde pleı-off synynyń qalǵan bes oıyny oınalady. Atalǵan matchtarda myna komandalar kúsh synasady: «Skenderbeý» (Korcha, Albanııa) – «Dınamo» (Zagreb, Horvatııa) «Seltık» (Glazgo, Shotlandııa) – «Malme» (Malme, Shvesııa) «Bazel» (Bazel, Shveısarııa) – «Makkabı» (Tel-Avıv, Izraıl) «Rapıd» (Vena, Avstrııa) – «Shahter» (Donesk, Ýkraına) «Valensııa» (Valensııa, Ispanııa) – Monako (Monako, Fransııa). Jalpy, Chempıondar lıgasynyń toptyq saıysynda 32 komanda oınaıtyny belgili. Onyń 22-si tikeleı joldamaǵa ıe bolsa, qalǵan 10 komanda joǵarydaǵy oıyndardyń nátıjesi boıynsha anyqtalady. Elaman Qońyr. Derek: egemen.kz. Sýret: uefa.com.