Kókshetaýda ákesi óz balasyna otashy bolypty

  KО́KShETAÝ. 19 tamyz. Kókshetaýda jeti jasar bala ákesiniń ózimbilerligi saldarynan ómirmen qoshtasa jazdady. Bul týraly egemen.kz tilshisi habarlady. Aqmola oblystyq balalar aýrýhanasynyń bas dárigeri Qaıyr Abdrahmanovtyń aıtýynsha, jetkinshek aýrýhanaǵa «jedel járdem» kóligimen ál ústinde jetkizilgen eken. Qala turǵynynyń 2008 jyly týǵan balasy aýrýhanaǵa tańǵy 05.00-de ákelingen. Shuǵyl túrde qaıta ota jasaǵan dárigerler oǵan «sırkýmsızodan keıingi qabyný» (súndetke otyrǵyzý) dıagnozyn qoıypty. Keıin anyqtalǵanyndaı, balasyn «musylman» etý nıetindegi áke otashyny alystan izdemeı, ózi iske kirisip ketken. Munyń sońy qan ketip, balanyń qyzýy kóterilip, álsireýine ákelip soqqan. Aqyry «qoja áke» jedel járdem shaqyrýǵa májbúr bolypty. Qazir bala ýchaskelik dárigerden kómek alyp júr. «Mundaı jaǵdaı, tipti, kópti kórgen dárigerlerdiń tájirıbesinde kezdespegen. Oqıǵaǵa selqos qaraýǵa bolmaıdy. Munyń ókinishti saldary bolýy múmkin edi. Sondyqtan polısııaǵa, densaýlyq saqtaý basqarmasyna habarladyq. Bala ákesiniń qylyǵy kópshilik talqysyna túsýi kerek», deıdi Qaıyr Hamıtuly. Baqbergen Amalbek. Derek, sýret: egemen.kz