Zardap shekkender sany artýda
Bangkokte dúısenbi kúni keshkilik el astanasy Taılandtyń ortalyǵynda bolǵan terrorlyq akt saldarynan qaza tapqandar men jaraqattanǵandar sany arta túsýde.
Jergilikti bıliktiń sońǵy málimetterine qaraǵanda, jarylystan 20 adam qaza taýyp, 123 adam dene jaraqattaryn alǵan. Polısııanyń aqparatynsha, qaza bolǵandardyń arasynda tórt sheteldik bar kórinedi. Olardyń úsheýi QHR-dyń jáne bireýi Fılıppınniń azamaty. Jarylys dúısenbi kúni jergilikti ýaqyt boıynsha 18 saǵat 56 mınýtta qalanyń dál ortasynda oryn alǵan bolatyn. Radıomen basqarylatyn qoldan jasalǵan bomba úndilerdiń Eravan qudaıyna arnalǵan qasıetti orynnyń sharbaǵynyń janyna qoıylǵan. Bomba jarylǵan sátte qasıetti orynǵa kelýshiler sany óte kóp bolǵan eken.
Nemister arnaýly qyzmet baqylaýynan saqtanýda
Jergilikti jáne sheteldik arnaýly qyzmet ókilderiniń baqylaý jasaýynan qaýiptengen Germanııanyń keıbir turǵyndary mıkrochıpterdegi aqparattardy óshirip tastaý úshin ózderiniń jeke bas kýálikterin mıkrotolqyndy peshterde «óńdeýden» ótkizýde.
Ǵalymdardyń tólqujattaǵy mıkrochıp shpıondyq áreket úshin paıdalanýǵa jaramaıdy degenderine qaramastan, kóptegen nemister saqtyq sharalaryna barýda. Osylaısha, ótken aptada Frankfýrt áýejaıynda 29 jasar er adam tutqyndalǵan. Polısııanyń aqparatynsha, ustalǵan adam mıkrochıp onyń jeke ómiriniń qol suǵylmastyǵyna nuqsan keltiredi dep qaýiptenip, óz qujatyn mıkrotolqyndy peshte óńdeýden ótkizgen. Sońǵy kezderi keıbir áleýmettik jelilerde jeke bas kýáligin qalaı óńdeý kerektigine úıretetin beınerolıkter paıda bola bastaǵany da belgili bolyp otyr.
AQSh-ty jańa qarýmen qorqytpaq
Soltústik Koreıa AQSh-qa buǵan deıin álemge belgisiz shabýyldaýshy quralmen shabýyl jasaıtyndyǵyn aıtyp kúsh kórsetken, dep habarlaıdy CNN agenttigi. Oǵan AQSh-pen Ońtústik Koreıanyń josparlanǵan birlesken jattyǵýlary sebepker bolyp otyr.
KHDR áskerı jattyǵýlardy ótkizbeýdi talap etýde. Al, odaqtastar bolsa bul shara óńirdi qorǵaý jáne Koreıa túbegindegi turaqtylyqty saqtaý maqsatyn kózdeıdi degen dáleldi kóldeneń tartýda. KHDR-dyń qazirgi armııasy men halqy búginde burynǵydaı AQSh-qa qolyna vıntovka alyp qarsy turatyn beıshara jaǵdaıda emes. Endigi jerde Soltústik Koreıa álemge beımálim shabýyldaýshy jáne qorǵanys quraldarymen jaraqtanǵan, dep málimdegen KHDR Ulttyq qorǵanys komıtetiniń baspasóz hatshysy. AQSh atyna kúsh kórsetýdi memlekettik telearna júrgizýshisi de qaıtalaǵan. Ol Soltústik Koreıanyń bul joly AQSh-qa onyń óz aýmaǵynda shabýyl jasaıtynyn atap kórsetken.
Kelimsekterdi elden ketirmek
Amerıkalyq mıllıarder Donald Tramp 2016 jylǵy prezıdent saılaýynda jeńiske jetken jaǵdaıda zańsyz mıgranttardy elden qýyp shyqpaq nıette, dep habarlaıdy RIA Novostı agenttigi.
Olar ketýge tıis... Bizdiń elimiz ne bolady, ne bolmaıdy, dep málimdegen Tramp. Sondaı-aq, ol prezıdent Barak Obamanyń kóshi-qon saıasaty salasyndaǵy jarlyǵynyń kúshin joıatyndyǵyn da atap kórsetken. Qoǵamdyq pikirge júrgizilgen saýalnamaǵa sáıkes, Donald Tramp ázirge Respýblıkalyq partııadan prezıdenttik laýazymǵa barlyq úmitkerlerden ozyq keledi. Buǵan deıin ol eger qajet bolsa óziniń saılaýaldy naýqanyna mıllıard dollar jumsaýǵa daıyn ekenin habarlaǵan bolatyn. Sonymen birge, ol jyl saıyn óziniń 400 mıllıon dollar tabys tabatynyn da jasyryp qalmaǵan kórinedi.
Ýsama ben Ladenniń balasy shabýyl jasaýǵa shaqyrdy
«Ál-Kaıda» Batys elderine shabýyl jasaýǵa shaqyrǵan Ýsama ben Ladenniń balasynyń (boljam boıynsha) habaryn taratqan. Terrorlyq toptyń sodyrlary Twitter-de Hamza ben Laden dep atalatyn adamnyń beınehabaryn jarııalaǵan kórinedi.
Onyń jasy shamamen 23 nemese 24-te. Aýdıojazbadaǵy er adamnyń daýsy AQSh pen onyń odaqtastaryna shabýyl jasaýǵa úndegen. Alda turǵan «nysanalar» retinde ol Londondy, Vashıngtondy, Parıjdi, Tel-Avıvti jáne Taıaý Shyǵystyń taǵy birneshe qalalaryn ataǵan. Eske sala ketsek, Ýsama ben Laden amerıkalyq arnaýly qyzmettiń júrgizgen operasııasy nátıjesinde 2011 jyldyń mamyrynda Pákistannyń Abbotabad qalasynyń shet aımaǵynda óltirilgen bolatyn.
Álemdegi eń uzaq reıs júzege asyrylmaq
Emirates áýe kompanııasy álemdegi eń uzaq ushatyn reısti iske qospaq. Ol baǵyt Dýbaı men Panamany jalǵastyratyn bolady.
Uzaqtyǵy 13,8 myń kılometrdi quraıtyn jańa baǵyt boıynsha alǵashqy ushý 2016 jyldyń 1 aqpanynda júzege aspaq. Dýbaıdan Panamaǵa deıingi jolǵa ketetin esepti ýaqyt 17 saǵat 35 mınýtty, al keıin qaraı 15 saǵat 45 mınýtty quraıtyn bolady. Reısti Boeing 777-200 LR ushaǵynyń oryndaıtyny da belgili bolyp otyr. Laınerdiń bortynda birinshi klasty segiz oryn, bıznes-klasty 42 oryn jáne ekonom klastaǵy 216 oryn bolmaq. Aıta ketý kerek, buǵan deıin 17 saǵatqa sozylǵan álemdegi eń uzaq ushýdy avstralııalyq Qantas kompanııasy júzege asyrǵan bolatyn. Ol ushaq AQSh-tyń Dallas qalasynan Sıdneıge ushyp barǵan edi.
Ekvadorda tótenshe jaǵdaı jarııalandy
Ekvador prezıdenti Rafael Korrea Kotopahı janartaýy oıanǵan aýdanda tótenshe jaǵdaı jarııalady, dep habarlady AFP aqparat agenttigi.
Biz Kotopahı janartaýynyń belsendiligine baılanysty tótenshe jaǵdaı jarııalaımyz. Nelikten men mundaı sheshim qabyldap otyrmyn. Ol yqtımal zardaptardy sheshý úshin resýrstardy qamtamasyz etýge jáne qajetti kúshterdi jumyldyrýǵa qajet, dep atap kórsetken Korrea óziniń apta saıynǵy halyqqa arnaǵan úndeýinde. RIA Novostı agenttiginiń málimetterine qaraǵanda, aldyn alý sharalary sheńberinde qazirdiń ózinde eldiń ortalyǵyndaǵy shaǵyn eldi mekenderden shamamen 400-deı adam basqa jaqqa kóshirilgen. Aýanyń lastanýyna baılanysty jergilikti turǵyndar medısınalyq betperde kııýge májbúr bolýda. El astanasynan shamamen 60 shaqyrym jerdegi Kotopahı janartaýy ótken jumada atqylaǵan bolatyn.
Internet materıaldary negizinde ázirlendi.
