Gaoda týrısterge súıisýge tyıym salynady

ASTANA. 1 sáýir. Úndistannyń Gao shtatyndaǵy Salvador-de-Mýndo derevnıasynda kópshilik oryndarda súıisýge tyıym salyndy. Bul týraly Redigo.ru  habarlady. Atalmysh jańa tártipti jergilikti turǵyndar oılap tapty. Olar munda álemniń ár túkpirinen kelip tynyǵýshylar tarapynan mundaı «ádepsiz» qylyqtardyń jasalýyna tózbeıtinderin jetkizip, osyndaı bastama kóterdi. Al jergilikti parlament óziniń kezekti otyrysynda ózderiniń kóz aldarynda súıisip turǵandardy kórgileri kelmegen jergilikti turǵyndardyń ótinishine birden qulaq asty. Sóıtip, bir aýyzdan qoldaý negizinde tıisti qarar qabyldandy. Alaıda, bul tártipti buzǵandarǵa naqty qandaı jaza qoldanylatyny ázirge belgisiz. Soǵan qaramastan, derevnıadaǵylar osy jańa tártipti ýaǵyzdap, týrısterdiń qaperlerine salatyn bannerlerdi jappaı ilip tastady. Degenmen, mamandar qazirdiń ózinde qabyldanǵan jańa sharanyń jergilikti kýrorttyń ımıdjine zııanyn tıgize bastaǵanyn da jasyrmı aıtyp otyr. Gao – Úndistannyń eń shaǵyn shtaty. Biraq soǵan qaramastan, ol eldiń bas kýrorty bolyp sanalady. Buryn bul mańaıda bári de bolǵan eken. Jaǵajaılarynyń kóptigi jaǵynan da bul jerge teńdesetin aımaq joq. Solardyń arasynda nýdısterdiń jaıyla júrip, sýǵa túsetin jaǵajaılary da osy mańda ornalasqan. Munda kezinde álemniń ár qıyrynan nebir sex-sımvoldar keletin bolǵan. Osynyń bári týrısterdiń myń-myńdap kelip jatýyn qamtamasyz etip turǵan. Murat Aıtqoja. Mánbe, sýret: NTV.