Prezıdent áıelder qaýymy ókilderimen kezdesti

ASTANA. 6 naýryz. Prezıdent Nursultan Nazarbaev elimizdiń barlyq óńirlerinen kelgen, ekonomıkanyń túrli sektorlarynda, mádenı-áleýmettik salalarda jáne memlekettik qyzmette isteıtin áıel jurtynyń ókilderimen kezdesti. Bul týraly akorda.kz habarlady. Memleket basshysy olardy kele jatqan Halyqaralyq áıelder kúnimen quttyqtap, Qazaqstannyń barsha áıelder qaýymyna baqyt, densaýlyq jáne baq-bereke tiledi. Nursultan Nazarbaev memlekettik saıasattyń basym baǵytynyń biri áıelderdiń ál-aýqatyn jaqsartý ekenin atap ótti. – Táýelsizdik jyldarynda biz kóp nárseni eńserdik. Qazir elimizde bereke men tynyshtyq ornady. «Qazaqstan-2050» Strategııasy, «Nurly Jol» jáne basqa barlyq baǵdarlamalar osyny kózdeıdi. Áıelder, otbasyn saqtaýshy retinde baq-berekeni eń aldymen balalarynan, dastarqanynan sezinedi, sol arqyly memlekettiń qamqorlyǵyn sezinedi», – dedi Prezıdent. Memleket basshysy eldegi áıelder qaýymy ókilderiniń belsendiligi artyp kele jatqanyna toqtaldy. – Búginde memlekettik qyzmettegi qyzmetkerlerdiń basym bóligin áıelder quraıdy. Densaýlyq saqtaý salasynda olardyń úlesi 75 paıyzǵa, bilim berý salasynda 65 paıyzǵa deıin jetedi. Bıznestegi basshylardyń da 40 paıyzy názik jandy arýlar, – dedi Nursultan Nazarbaev. Elbasy týý deńgeıiniń ósýi jalǵasyp kele jatqanyna, tek byltyrdyń ózinde dúnıege 400 myń sábı kelgenine nazar aýdardy. Nursultan Nazarbaev bıyl el táýelsizdigine 24  jyl tolatynyn eske saldy. – Bul ýaqyt qas qaǵymda óte shyqty, sebebi bárimizdiń nazarymyz jumysta boldy. Búgin sonyń nátıjesin kórip otyrmyz –  biz qurǵan memleketti búkil álem tanıdy, qurmetteıdi, – dedi. Memleket basshysy eldegi turaqtylyqtyń arqasynda ekonomıkamyz qarqyndy damyp kele jatqanyn aıtty. – Búginde jer betinde, BUU málimeti boıynsha, 800 mıllıon adam ashtyqtan japa shegýde. Jyl saıyn azyq tapshylyǵynyń kesirinen 6 mıllıon bala, 30 mıllıon eresek adam óledi. 400 mıllıon adam aýyz sýǵa zárýlik zardabyn tartady. Jyl saıyn planetamyzda 30 áskerı qaqtyǵys bolyp, sonyń saldarynan saǵat saıyn 40 adam qaza tabady. Sondyqtan, eldiń ishki turaqtylyǵyn kózdiń qarashyǵyndaı qorǵaýǵa tıispiz, – dedi Nursultan Nazarbaev. Sońynda Memleket basshysy kóp balaly analardy – M.Aksıevany Altyn alqamen jáne A.Jumabaevany Kúmis alqamen marapattady. Kezdesýge Memlekettik hatshy, Prezıdenti janyndaǵy áıelderi isi jáne otbasylyq-demografııalyq saıasat jónindegi Ulttyq komıssııanyń tóraıymy G.Ábdiqalyqova, Parlament Májilisiniń depýtaty G.Qaraǵusova, Densaýlyq saqtaý jáne áleýmettik damý mınıstri  T.Dúısenova, Parlament Májilisiniń depýtaty I.Aronova, Semeı qalasynyń ınnovasııalyq gýmanıtarlyq-zań ýnıversıtetiniń rektory Sh.Qurmanbaeva, «Qazaq arýy-2014» respýblıkalyq arýlar baıqaýynyń jeńimpazy G.Jolanova, ártis B.Súıinshálına, «Astana Opera» MOBT balet ártisi S.Sýnogava, tennısshi Z.Dıas, «Planeta patshaıymy-2014» ataǵynyń ıegeri A.Jumabaeva, bokstan álem chempıony N.Qyzaıbaı, «Qazaqstan» RTRK balalarǵa arnalǵan «Balapan» telearnasynyń dırektory L.Sultanqyzy, voleıbolshy S.Altynbekova, tanymal «Tatıanalar trıosynyń» qatysýshylary T.Býrmıstrova, T.Poltavskaıa jáne T.Martynenko, «Turkvizion-2014» II halyqaralyq án konkýrsynyń jeńimpazy J.Doǵalova, kóp balaly ana M.Aksıeva, Qazaqstan jastarynyń arasynda «jasyl bastamalardy» ilgeriletý bastamashysy  T.Nemsan, áskerı qyzmetshi D.Rysbekova, professor, Qazaqstan ınjenerlik akademııasynyń korrespondent-múshesi Q.Aqqoshqarova, «Astana Solar» fotoelektrlik modýlder qurastyrý zaýytynyń tehnıgi  A.Tashanova, jeke kásipker A.Qurmashova, Qostanaı oblysynan aýdandyq aýrýhananyń bas dárigeri L.Fınk, Q.Sátbaev atyndaǵy Ekibastuz ınjenerlik-tehnıkalyq ınstıtýtynyń dosenti D.Sıvaraksha, «Astana Opera» MOBT jetekshi solısi S.Ahmetova qatysty. Kezdesýge qatysýshylar Memleket basshysyna ana men balaǵa qamqorlyq jasaýǵa, otbasylyq qundylyqtardy nyǵaıtýǵa baǵyttalǵan saıasat júrgizip otyrǵany úshin alǵystaryn aıtty. Sonymen qatar halyqtyń jáne árbir qazaqstandyq otbasynyń ál-aýqatyn qamtamasyz etýge baǵyttalǵan baǵdarlamalardy júzege asyrýdy ári qaraı jalǵastyrýdyń mańyzdylyǵyn atap ótti. Joldybaı Bazar. Derek, sýret: akorda.kz.