Ombydaǵy Naýryz merekesine 7000 adam qatysty

Bıylǵy Naýryz Omby qalasynda buryn-sońdy bolmaǵan aýqymda ótkizildi. Buryn ony qalamyzdaǵy túrkitildes halyqtardyń ókilderi ózdi-ózi, bólek-bólek atap ótetin. Qazaqtar bir jerde, ózbekter basqa jerde, tatarlar men ázerbaıjandar da buıyrǵan oryndarynda toılaıtyn. Bıyl qala basshylyǵy barlyq ulttyq-mádenı ortalyqtardyń báriniń basyn biriktirip, Naýryzdy ortaq túrde atap ótý kerek degen sheshim qabyldady. Sóıtip, oǵan «Krasnaıa zvezda» sport kesheni berildi. Jeksenbi kúni tańerteńnen bastap barlyq Omby halqy «Krasnaıa zvezda» sport kesheni ornalasqan «VLKSM-niń 30 jyldyǵy» atyndaǵy parkke aǵyldy. Olardyń arasynda musylmandar ǵana emes, orystar, ýkraındar, belarýstar da boldy. Bári de Shyǵystyń halyq merekesi Naýryzdy kórgisi keletin sııaqty. Onyń ústine aldyn ala habarlanǵan baǵdarlamalary da jurtty qatty qyzyqtyrǵan edi. Sporttyq jarystar, balalarǵa arnalǵan ulttyq oıyndar, ulttyq án-kúıler, dámi til úıiretin Shyǵys taǵamdary bolatynyn BAQ qaıta-qaıta aıtyp jatty. Sporttyq jarystardyń bári dalada uıym­dastyrylyp, ony kóbinese er-azamattar qyzyqtady. Al sport kesheniniń ishinde árbir ulttyń tátti-dámdilerine toly bolǵan jaıma bazarlar áje-analar men balalardy qarq qyldy. Osy jerdegi ázil-qaljyńdar, án - kúıler, qyzyq baǵdarlamany kórýge kelgen adamdardyń birin de selsoq qaldyrmaı, bárin de qyzyǵyna elitip áketti. Sonyń ishinde qurylǵanyna eki-aq jyl bolǵan ázerbaıjandardyń «Vatan-Rodına» ulttyq ortalyǵy ózderiniń ekspozısııalaryn tuńǵysh ret usyndy. Ázerbaıjandaǵy ataqty «Qyz munarasynyń» kishireıtilgen nusqasy, ulttyq kıimdegi qýyrshaqtar, mýzykalyq aspaptar – bár-bári olardyń tarıhı otandaryn kózge elestetti. Sonymen birge, ázerbaıjannyń ishine quıylǵan ystyq sý uzaq ýaqyt salqyndamaıtyn ataqty aǵash tostaǵandary da jurttyń qyzyǵý­shylyǵyn týdyrdy. Ombydaǵy «Móldir» atty qazaq ulttyq mádenı ortalyǵynyń qurylǵanyna 25 jyl bolǵan. Olar ulttyq kádesyılar satatyn «Merýert» atty dúken de ashqan eken. Sony­men birge, «Omby qazaqtary» atty gazet te shyǵarady. Biz osy gazettiń bas redaktory Tor­ǵyn Áshenovamen sóıleskenimizde ol: «Búgingi mereke barlyq halyqtardyń birigýiniń, bir maqsat, bir tilekte bolýynyń qanshalyqty mańyzdy ekenin kórsetti. Basqa halyqtardyń mádenıetin, ónerin bilgen saıyn, tanyǵan saıyn olarǵa degen qurmetiń de arta túsedi. Bizdiń bir-birimizdi tereńirek bilýimizge Naýryzdyń paıdasy óte kóp», dedi. Sport kesheniniń ishindegi «Dastarqan» alańyna kelgen jurttyń bárine tegin taǵamdar taratyldy. Musylmandardyń dástúri boıynsha bir qazannan úlestirilgen dám sodan aýyz tıgen barlyq halyq ónimderin tatýlyqqa shaqyrady eken. Mereke oılaǵannan da artyq kóńildi boldy. Tek belgilengen orynnyń tarlyǵy ǵana kózge anyq kórinip turdy. Kelesi jyly qala basshylyǵy budan góri keńirek oryndy tańdaıtyn shyǵar. Sonda Naýryz búgingiden de kóp halyqty bir-birimen jaqyndastyra túseri sózsiz. Andreı MOTOVILOV, «Omskaıa pravda» gazetiniń bas redaktory. Reseı Federasııasy, Omby qalasy. Sýretterdi túsirgender Evgenııa KARMAEVA men Tatıana ShIPILOVA.