Bilim salasynda atqarylǵan is-sharalar naqtylandy

Astanadaǵy Ortalyq kommýnıkasııalar qyzmetinde «Bilim jáne ǵylym júıesiniń damýy týraly» taqyryp aıasynda Bilim jáne ǵylym mınıstrligi ókilderiniń qatysýymen brıfıng ótti. Basqosýda Bilim jáne ǵylym mınıstri Aslan Sárinjipov bıylǵy oqý jylyndaǵy jetistikterge toqtala kelip, «1 qyrkúıekte 7,5 myńnan astam mektep 2 mln. 600 myńnan astam oqýshyny qabyldaıdy, olardyń ishinde 336 myńy  mektep tabaldyryǵyn alǵash attaıtyn 1-synyptyń balalary. Iаǵnı, jyl saıyn birinshi synypqa baratyn balalar sany artyp kele jatqandyqtan biz úsh aýysymdaǵy jáne apatty mektepter problemasyn sheshýimiz kerek. Osyǵan oraı, bıyl 157 mektep paıdalanýǵa berilip, osy arqyly úsh aýysymdaǵy mektepterdiń 80-i qalyp tur. Al buǵan deıin olardyń sany 100-ge jýyq bolǵan edi. Sonymen qatar, apatty mektepter sany eki esege azaıyp, 136-dan 66 qalady. 2017 jyldyń sońyna qaraı osy problemany tolyqtaı sheshemiz dep josparlap otyrmyz», dedi.    Munymen qosa, vedomstvo basshysy 8700 mektepke deıingi uıymǵa 760 myń bala baratynyn, jyl sońyna deıin 10 myń oryndyq 40 balabaqsha iske qosylatynyn, kúrdeli jóndeý sharalarymen 250 mektep qamtylǵanyn, al aǵymdaǵy jóndeý jumystary 5 myńnan astam mektepte júrgizilgenin jetkizdi. Al 4,5,6 jáne 11 synyptarǵa oqýlyqtar alýǵa bıyl 12,5 mlrd. teńge bólinip, búginde barlyq óńirler oqýlyqtarmen tolyqtaı qamtamasyz etilgen eken. «Búginde bizdiń basty maqsatymyz bilim berýdiń mazmunyn jetildirý bolyp tabylady, al baǵalaý júıesi mazmunmen tikeleı baılanysty. Iаǵnı, eger de biz bilimdi damytýǵa ǵana emes, sonymen qatar, daǵdy men biliktilikti damytýǵa ekpin qoıatyndyǵymyzdy aıtatyn bolsaq, onda sáıkesinshe osy daǵdyny baǵalaı alatyn júıe qajet bolady. Bıyl biz UBT-ny ákimshilendirý máselelerin jańǵyrtý boıynsha jumysty jalǵastyramyz. Baǵalaýdyń jańa júıesine toqtalatyn bolsaq, osy baǵytta túrli nusqalardy qarastyramyz. Onyń ishinde UBT-ny onlaın túrde tapsyrý da bar», dedi vedomstvo basshysy. Ult josparyndaǵy 76-shy qadam aıasynda materıaldyq-tehnıkalyq bazany jańartýǵa jáne muǵalimderdi yntalandyrýǵa basa nazar aýdarylyp, 96 mektepke granttardy taǵaıyndaý júıesin jetildirý qarastyrylǵan. Aldaǵy jyldary jetekshi 10 JOO jáne 10 kolledj úshin 48 jańa bilim berý baǵdarlamalary jasaqtalmaq. Sondaı-aq, joǵary oqý oryndarynyń 24 zerthanasy men kolledjderdiń 57 zerthanasy jańa qurylǵylarmen jabdyqtalady. Kolledjderdegi sheberhanalardy jabdyqtaýǵa respýblıkalyq bıýdjetten bólingen qarajat 2 esege kóbeıtilgen. 2015 jyly 15 oqý ornyna Búkilálemdik banktiń nesıesi esebinen 40 mln. teńgeden qosymsha qoldaý kórsetildi. Bul 458 sheberhana men zerthanalardy zamanaýı qurylǵymen jabdyqtaýǵa múmkindik beredi. Bıylǵy jyly 32168 grant bólinse, konkýrsqa 67377 adam qatysty. «Máńgilik El jastary – ındýstrııaǵa!» jobasy aıasyndaǵy kvota boıynsha oqý konkýrsyna 6457 adam qatysty. Nátıjesinde 29657 talapker grantqa ıe boldy. Olardyń ishinde 2077-si «Altyn belgi» ıegerleri, 1126-sy Nazarbaev zııatkerlik mektebiniń túlekteri, 155-i jalpy bilim berý pánderi boıynsha halyqaralyq jáne respýblıkalyq olımpıadalardyń jeńimpazdary, 825-i bilim berý pánderi boıynsha halyqaralyq jáne respýblıkalyq ǵylymı jarystardyń jeńimpazdary, 521-i halyqaralyq jáne respýblıkalyq sporttyq jarystardyń jeńimpazdary. Komıssııanyń sheshimimen konkýrsqa qatysqan barlyq 483 jetim bala men 273 múgedek bala grantqa ıe boldy. Basqosý barysynda mınıstr men onyń áriptesteri JOO-ǵa bilim granttaryn taǵaıyndaýǵa, oqýlyqtardyń sapasyn baqylaýǵa jáne onymen mektepterdi qamtamasyz etýge qatysty qoıylǵan suraqtarǵa jaýap berdi. Berik SADYR, «Egemen Qazaqstan».