Prezıdent «Ulttyq ǵylymı kardıohırýrgııa ortalyǵy» AQ tóraǵasyn qabyldady

ASTANA. 27 tamyz. Elbasy «Ulttyq ǵylymı kardıohırýrgııa ortalyǵy» AQ basqarmasynyń tóraǵasy Iýrıı Pıany qabyldady. Bul týraly akorda.kz habarlady. Kezdesý barysynda Qazaqstanda medısınany, sonyń ishinde kardıohırýrgııalyq jáne kardıologııalyq qyzmetti damytý perspektıvalary talqylandy. Qazaqstan Prezıdenti kardıohırýrgııalyq ota jasatýǵa muqtaj adamdardyń sany az ýaqyt buryn ǵana 10-15 myń adamǵa jetkenin aıtty. «Biz bul adamdarǵa járdem bere almadyq. Múmkindigi barlar shetelge shyqty. Alaıda, báriniń shamasy kelmedi, adamdardan aırylyp jattyq. Al búginde elordada jáne Qazaqstannyń kóptegen oblystarynda júrekke ashyq otalar jasalady. Olardyń qatarynda Ulttyq ǵylymı kardıohırýrgııa ortalyǵy birinshi oryndy ıelenedi, ol qazirdiń ózinde TMD elderinde jáne álemniń basqa da memleketterinde tanymal bola bastady. Ortalyqta jasalǵan operasııalar sondaı-aq Qazaqstannyń úlken ımıdjdik jobasyna da aınaldy, biraq, eń bastysy – kóptegen adamdardyń ómirin saqtap qalyp jatyrmyz», – dedi Memleket basshysy. Iý.Pıa jeke óziniń jáne búkil ujymnyń atynan Nursultan Nazarbaevqa kardıohırýrgııa ortalyǵyn qurǵany úshin alǵys aıtty. «Siz ony ashqan kezde muny saraı dep baǵaladyńyz. Shynynda da solaı, munda naǵyz ǵajaıypty jasaýǵa bolady. Búginde bizdiń ortalyqty Qazaqstan ǵana emes, búkil álem biledi. Mysaly, birer kúnde bizge Eýropa elderinen 30-ǵa jýyq maman kelip, tájirıbemizdi kóredi. Qazaqstanda júrgizilip jatqan saıasattyń arqasynda búgingi tańda tek bizdiń respýblıkada ǵana qoldanylatyn ota ádisin engize aldyq. Sonyń nátıjesinde biz eýropalyq mamandar kelip tanysatyndaı tájirıbege ıe boldyq», – dedi «Ulttyq ǵylymı kardıohırýrgııa ortalyǵy» AQ basqarmasynyń tóraǵasy. Aıdar О́risbaev. Derek, sýret: akorda.kz.