Baden-Vıýrtemberg federaldyq jeriniń Shtýttgart qalasyndaǵy jumys sapary sheńberinde Qazaqstannyń GFR-daǵy elshisi Bolat Núsipov atalǵan jerdiń EO jáne halyqaralyq qarym-qatynastar máseleleri jónindegi mınıstri Peter Frıdrıhpen kezdesý ótkizdi. Kelissózderdiń kún tártibinde Qazaqstan men Baden-Vıýrtemberg arasyndaǵy ekijaqty saýda-ekonomıkalyq qatynasty jetildirý máseleleri talqylandy. Sondaı-aq, nemis mınıstri josparlanǵan ekonomıkalyq aımaqtyq delegasııany Qazaqstanǵa ózi bastap ketetindigin habarlady. Baden-Vıýrtembergke sapar barysynda qazaqstandyq dıplomat Karlsrýe jáne Ýlm sııaqty iri ındýstrııalyq qalalaryndaǵy Qazaqstannyń ekonomıka kúnderine qatysty jáne aımaqtyń basty kompanııalarynyń basshylyǵymen kezdesti. «Qazaqstan joly – 2050: qazaqstandyq-germandyq yntymaqtastyqtyń jaı-kúıi jáne damý bolashaǵy» atty ekonomıkalyq forýmdar Qazaqstannyń Germanııadaǵy Elshiliginiń bastamasy negizinde Baden-Vıýrtemberg federaldyq jeriniń úkimeti men Karlsrýe jáne Ýlm qalalarynyń saýda-ónerkásiptik palatalarynyń uıymdastyrýymen ótti. Atalǵan forýmdar barysynda Qazaqstan elshisi nemis bıznes-qaýymdastyǵy ókilderin «Nurly Jol – bolashaqqa bastar jol» Jańa Ekonomıkalyq Saıasatynyń negizgi jaǵdaıymen jáne EKSPO-2017 halyqaralyq kórme sheńberindegi ınvestısııalyq ahýalynyń múmkindikteri boıynsha sheteldik ınvestorlardy qoldaýǵa jáne qorǵaýǵa arnalǵan sharalarymen tanystyrdy. О́z kezeginde nemis tarapy aımaqaralyq árekettestiktiń nyq damýyna jáne elimizdiń ınvestısııalyq ahýalynyń artýyna osyndaı is-sharalar men kelissózderdiń mańyzdylyǵy erekshe ekenin atap ótti. GFR-ǵa osy aımaqtyń isker toby qazaqstandyq naryqqa qatysýǵa degen yntalary men nıetterin bildirdi. «Egemen-aqparat».
Sýret: bnews.kz
