Ornello Mýtı Máskeý teatrlarynyń birinde óner kórsetedi

ASTANA. 12 naýryz. Italııanyń ataqty kınoaktrısasy Ornella Mýtı (shyn aty-jóni Francheska Romana Rıvellı) jýyrda Reseıdegi teatr sahnalarynyń birinde óner kórsetedi. Búginde ol osyǵan baılanysty daıyndyq jumystaryn bastap ketti. Bul ártistiń Reseı jerindegi alǵashqy spektakli bolmaq. Qazirgi tańda osyǵan qatysty kelissózder júrgizilip jatyr. Muny TASS habarlady. 2010 jyly Mýtı dramatýrg Djannı Klementıdiń «Evreı» atty spektaklinde oınady. Bul ártistiń alǵashqy spektakli ekenin aıta keteıik. Enrıko Marııa Lamannanyń rejısserlyǵymen ótken qoıylym Italııada asa qyzyǵýshylyq týdyrdy. «Alǵashynda biz Reseıde de osy spektakldi qoıǵymyz keldi. Alaıda, keıin bul oıymyzdan aınyp, Sılvano Spadtyń «Mystannyń soty» atty pesasyna toqtadyq. Bul qoıylymdy Todıdegi teatr festıvali úshin arnaıy daıyndaǵan edik», – deıdi Enrıko Lamanna. Atalǵan eki pesa da orys tiline aýdarylǵan. Tipti Mýtı Reseı sahnasynda orys tilinde oınaýy da ábden múmkin. Sebebi, ol bul tilde erkin sóıleı alady. Onyń anasy jartylaı orys, jartylaı eston qyzy kórinedi. Kezinde Estonııanyń Tartý qalasynda turyp, keıinirek Italııaǵa qonys aýdarǵan. Ártistiń daıyndyqty qashan bastaǵany ázirge belgisiz. Kınodaǵy debıýtin 14 jasynda bastaǵan Francheska Romana Rıvellıge qazirgi Ornella Mýtı degen laqap atty usynǵan rejısser eken. Bir qyzyǵy, onyń birinshi personajynyń aty da Francheska bolǵan. Jurt onymen shatastyryp almas úshin ári kámeletke tolmaǵan qyzǵa boıjetkenniń rolin berý úshin fılmdi túsirýshi top osyndaı qadamǵa barǵan. Aıta keteıik, Ornella Mýtı 9 naýryzda 60 jasqa toldy. Reseılik kórermender Mýtıdi Adrıano Chelentanomen birge shyrqaǵan áni arqyly jaqsy tanıdy. Elaman Qońyr. Derek: TASS. Sýret: kp.ru.