ASTANA. 31 tamyz. Memleket basshysy Qytaı Halyq Respýblıkasyna memlekettik sapary aıasynda birqatar korporasııa basshylarymen kezdesti. Bul týraly akorda.kz habarlady.
Elbasy «SITIK Grýpp» korporasııasynyń dırektorlar keńesiniń tóraǵasy Chan Chjenmınmen kezdesti. Kezdesý barysynda birlesken ınvestısııalyq jobalardy júzege asyrý, sondaı-aq Qazaqstannyń «Nurly jol» baǵdarlamasy aıasyndaǵy ınfraqurylymdyq damýyna kompanııanyń qatysýy máseleleri talqylandy.
Memleket basshysy "SITIK Grýpp" korporasııasy men Qazaqstannyń jaqsy yntymaqtastyq tarıhy bar ekenin atap ótti.
«Biz birlesip jumys istegen jyldary mol tájirıbe jınadyq. Kompanııa Qazaqstan naryǵyndaǵy qyzmeti kezinde oń nátıjelerge jetti. Qazir jańa zaman kele jatyr, jańa jobalar men mindetter týyndaýda», – dedi Nursultan Nazarbaev.
Chan Chjenmın kompanııaǵa kóp jyldar qoldaý kórsetkeni jáne elde sheteldik ınvestorlarǵa qolaıly jaǵdaı jasaǵany úshin Memleket basshysyna alǵys aıtty.
Memleket basshysy sondaı-aq «Sınhýa» korporasııasy basqarmasynyń tóraǵasy Ho Sınhýamen kezdesti. Kezdesý barysynda taraptar energetıka sektorynyń damý perspektıvalaryn, sondaı-aq korporasııanyń Qazaqstannyń kómir ónerkásibine qatysýyn ulǵaıtý máselelerin qarastyrdy.
Nursultan Nazarbaev «Sınhýa» korporasııasymen buryn qol jetkizilgen ýaǵdalastyqtardyń bizdiń elimiz úshin serpindi máni bar ekenin aıtty.
«Sizdiń kompanııa Qazaqstanda birinshi ret kómirdi keshendi óńdeýden ótkizedi. Onyń mol qory bar ekenin eskersek, bul bizdiń energııa teńgerimi úshin zor mánge ıe», – dedi Elbasy.
Sonymen qatar, Prezıdent CNPC korporasııasynyń dırektorlar keńesiniń tóraǵasy Van Ilınmen kezdesti. Kezdesýde Qazaqstannyń munaı-gaz salasynyń jańa ekonomıkalyq jaǵdaıdaǵy damýyna korporasııanyń qatysý máseleleri talqylandy.
Memleket basshysy Respýblıkamyz ben CNPC kompanııasynyń zor yntymaqtastyq tájirıbesi bar ekenin, osy jyldar ishinde taraptar ózara is-qımyldyń qomaqty bazasyn qalyptastyrǵanyn aıtty.
«Kompanııanyń munaı-gaz naryǵyna qatysýy – bizdiń QHR-men yntymaqtastyǵymyzdyń basty tarmaqtarynyń biri. Sizdiń korporasııa kómirsýtegin óndirý, tasymaldaý jáne óńdeý salasynda jumys isteıdi. Bıyldan bastap CNPC-diń Qazaqstan Prezıdenti janyndaǵy Sheteldik ınvestorlar keńesiniń quramyna kirýiniń de mańyzy bar», – dedi Nursultan Nazarbaev.
Elbasy korporasııanyń qatysýymen elimizde júzege asyrylyp jatqan mańyzdy jobalarǵa toqtaldy.
«Qashaǵan kenishi ıgerilip, Shymkent munaı óńdeý zaýyty jańǵyrtylýda. Mańǵystaý oblysynda munaı-gaz jabdyqtary kesheni, «Beıneý-Bozoı» gaz qubyry salynýda. Bul jobalar zor mańyzǵa ıe jáne búgin QHR tóraǵasy Sı Szınpınmen kelissózderimizdiń arqaýy bolady», – dedi Prezıdent.
Nursultan Nazarbaev korporasııanyń shıkizat sektorynan basqa salada da baı tájirıbesi bar ekenin aıtty. Osyǵan baılanysty Memleket basshysy CNPC-di Astanada qurylýy josparlanyp otyrǵan halyqaralyq qarjy ortalyǵynyń jumysyna da belsene qatysýǵa shaqyrdy.
Sońynda Qazaqstan Prezıdenti CNPC-diń ozyq tehnologııalar ázirleýdegi qyzmetine joǵary baǵa berdi jáne osy baǵytta birlese jumys isteýge múddelilik bildirdi.
Van Ilın Qazaqstan naryǵynda 20 jyl boıy jumys istegen kompanııaǵa qoldaý kórsetkeni úshin Nursultan Nazarbaevqa alǵys aıtty.
Aıdar О́risbaev.
Derek, sýret: akorda.kz.
