25 tamyzda Aqordada Elbasy Nursultan Nazarbaev Tatarstan Respýblıkasynyń Prezıdenti Rýstam Mınnıhanovpen kezdesti, dep habarlady Qazaqstan Respýblıkasy Prezıdentiniń baspasóz qyzmeti.
Memleket basshysy R.Mınnıhanovty Tatarstan Respýblıkasynyń Prezıdenti qyzmetine resmı kirisýimen quttyqtady jáne Qazaqstannyń Reseı Federasııasynyń Tatarstan tárizdi iri óńirimen dostyq pen senimge negizdelgen dástúrli yntymaqtastyǵy qazirgi qarqynyn joǵaltpastan, odan ári tabysty damı beretinine senim bildirdi.
Kezdesý barysynda saýda-ekonomıkalyq, ǵylymı-tehnıkalyq jáne mádenı yntymaqtastyqty damytý máselesi talqylandy. Áriptestiktiń perspektıvaly baǵyttary retinde máshıne jasaý, munaı jáne munaı-hımııa salalary, aýyl sharýashylyǵy, mádenı-gýmanıtarlyq jáne ǵylymı-tehnıkalyq yntymaqtastyq jáne ózge de salalar atap ótildi. Yntymaqtastyqtyń mańyzdy baǵyty ınnovasııa salasy bolyp tabylady. Taraptar jol qurylysy jáne munaı-hımııa salalaryndaǵy birlesken ınnovasııalyq jobalardy iske asyrý múmkindigin qarastyrady.
Sonymen qatar, Tatarstan basshylyǵy qazaqstandyq astyqty satyp alý nıetin bildirdi.
Qazaqstanda “KamAZ”, “Qazan tikushaq zaýyty” kásiporyndarymen birneshe birlesken jobalar tabysty júzege asyrylýda. 2008 jyly “KamAZ-Injınırıng” birlesken kásiporny 10,5 mıllıard teńgeniń ónimin shyǵaryp, Qazaqstannyń júk kólikteri rynogynyń 75 paıyzyn qamtamasyz etti.
Qazaqstan Respýblıkasymen “Tatneft” AAQ, “Nıjnekamskneftehım” AAQ, “Nıjnekamskshına” AAQ, “KAMA” saýda úıi” AAQ, “Kazanorgsıntez” AAQ, “Almetev qubyr zaýyty” AAQ jáne Tatarstannyń ózge de kásiporyndary yntymaqtastyq jasap keledi.
Jýrnalısterge arnalǵan brıfıngte Tatarstan Respýblıkasynyń Prezıdenti Astana qurylysynyń qarqynyna tańdanysyn bildirdi.
– Munda jasalǵannyń bári de joǵary álemdik deńgeıde atqarylǵan. Kóptegen nysandardyń álemde balamasy joq. Biz munda kelgen saıyn úırenip qaıtamyz, – dedi R.Mınnıhanov.
Tatarstan Prezıdenti Qazaqstan ekonomıkasyn damytýdaǵy Nursultan Nazarbaevtyń róline joǵary baǵa berdi.
Nursultan Nazarbaev – biz úshin úlgi-ónege. Bul – postkeńestik keńistiktegi Ult Lıderiniń jarqyn mysaly, sonyń arqasynda respýblıka gúldenip, daǵdarystyń barlyq saldarlaryn tabysty eńsere bildi. Nursultan Ábishuly – bul tulǵa, memleketti osyndaı lıderdiń basqaryp otyrǵany Qazaqstan úshin baqyt, – dep atap kórsetti R.Mınnıhanov.
* * *
Elbasy Qabyldady
Memleket basshysy Nursultan Nazarbaev Keden odaǵyna qatysýshy memleketterdiń ishki ister mınıstrleri: Reseı Federasııasynan – Rashıd Nurǵalıevti, Belarýs Respýblıkasynan – Anatolıı Kýleshovti, Qazaqstan Respýblıkasynan – Serik Baımaǵanbetovti qabyldady, dep habarlady Qazaqstan Respýblıkasy Prezıdentiniń baspasóz qyzmeti. Mınıstrler Memleket basshysyna Astanada ótken Keden odaǵyna qatysýshy memleketter Ishki ister mınıstrleri keńesiniń qorytyndylary, atap aıtqanda, Qazaqstan, Belarýs jáne Reseı quqyq qorǵaý organdarynyń uıymdasqan qylmysqa, esirtki bıznesine jáne zańsyz kóshi-qonǵa qarsy kúrestegi, biryńǵaı kedendik keńistikte aqparattar almasýdaǵy yntymaqtastyǵyn damytý máselesi týraly baıandady. Jýrnalısterge arnalǵan brıfıngte Rashıd Nurǵalıev pen Anatolıı Kýleshov Qazaqstanda júrgizilip jatqan quqyq qorǵaý júıesin reformalaýǵa joǵary baǵa berdi. – Bizde, Reseıde de ishki ister mınıstrligin jańǵyrtý isi júrgizilýde. Onda da birinshi mindet – ózge qurylymdarǵa esh aýyrtpalyqsyz berý arqyly tán emes mindetterden bosatyp, bar nazardy qylmyspen kúreske shoǵyrlandyrý. Men Qazaqstannyń quqyq qorǵaý júıesin jańǵyrtýdyń negizgi baǵyttaryn qoldaımyn, – dedi Reseı ishki ister mınıstri. R.Nurǵalıev reforma Qazaqstannyń quqyq qorǵaý qurylymdary jumysynyń ashyqtyǵy men naqtylyǵyna múmkindik týǵyzatynyn atap ótti. Qazaqstanda júrgizilip jatqan reformanyń basty maqsaty – polısııa jumysyn jaqsartý. Bul ishki ister organdarynyń jumysyn el halqyna etene etýge jol ashady, – dep atap ótti A.Kýleshov.
