Ertis ózenin endeıtin alyp kópir

Bul kópir oblys ortalyǵy men Aqsý qalasy aralyǵyn qosady. Astana, Reseı, Qytaıǵa deıingi jol júrý ýaqytyn jedeldetedi. Aldaǵy jyly bul alyp jobalar aıaqtalyp, qurylys paıdalanýǵa berilgen soń, jol-kólik ınfraqurylymynyń damýy óńirdiń órkendeýine ári qaraı da úlken jol ashary anyq. Bul rette, «Nurly Jol» baǵdarlamasy sheńberinde qolǵa alynǵan, Elbasy tapsyrmasy boıynsha qurylysy júrgizilip jatqan «Astana-Pavlodar-О́skemen» avtokólik joly úlken syılyq bolmaq. Avtobannyń basym bóligi bizdiń oblys aýmaǵymen ótedi. Jalpy, «Ortalyq-Shyǵys» avtojol dáliziniń bóligi bolyp tabylatyn jobanyń quny 53 mlrd. 808 mıllıon teńgege baǵalanyp otyr. Jańadan salynyp jatqan kópirdiń uzyndyǵy 12,3 shaqyrymdy quraıdy. Jol mamandarynyń aıtýynsha, bul Ortalyq Azııadaǵy eń uzyn kópir bolyp sanalady eken. Sonymen birge, 4 jolaqty avtoban jobasy da Ertis ózeni arqyly ótetin eski kópirdegi avtokólik qozǵalysynyń azaıýyna septigin tıgizedi. Keler jyly kópir, avtoban paıdalanýǵa berilgen soń tranzıttik baǵytta qatynaıtyn barlyq kólikter burynǵydaı oblys ortalyǵynyń ishin aralamaı, qalany syrtynan aınalyp óte­di. Bul qorshaǵan ortaǵa da jaqsy áser etpek. Ekinshiden, jańa kópir, avtoban jobasy Eýrazııalyq ekonomıkalyq odaq sheńberindegi bizdiń elimiz ben Reseıdiń birlesken alǵashqy iri ınfraqurylymdyq jobasy bolyp tabylady. Kópirdiń qurylysyna qoldanylyp jat­qan materıaldardyń 80 paıy­zy – otandyq ónimder. Ken­je­­­kól aýylynda negizgi qury­lys kesheni ornalasqan. Mer­digerler qurylysqa kirispes buryn oblystyń qurylys ın­dýs­trııasynyń naryǵyn ny­­­sanaǵa alyp, zertteý ja­­sapty. Nátıjesinde qurylys resýrstarynyń basym bóligin óńirdegi qurylys kompanııalarynan satyp alý týraly sheshim qabyldandy. Negizgi jumys kúshi de oblystan tartyldy. Al metall qurylǵylar men sement elimizdiń ózge óńirlerinen jetkizildi. «QazAvtoJol» UK» AQ-tyń oblystyq fılıalynyń málimetinshe, qurylys jumys­taryna 10 myń tonna metall jáne 30 myń tekshe metr beton qoldanylady. Qazir negizgi jumystar Ertis ózeni boıynda júrgizilýde. Tıisti sharalar kes­tege sáıkes atqarylýda. Nysan 2016 jyldyń jeltoqsanynda qoldanysqa beriledi. Jańa avtomagıstral elmizdiń qalalaryn Batys Sibirdiń iri ekonomıkalyq ortalyqtary – Novosibirmen, Omby jáne Tom qalalarymen jalǵaıdy. Tórt jolaqty avtoban sement-betondy jáne asfalt-betondy jabyndylarmen jasalýda. Joldyń boıynda jolaýshylarǵa qyzmet etetin servıstiń barlyq túri bolady. Jańa avtobandaǵy qurylys ju­mystaryn jol naryǵynda tájirıbesi bar «Dena Rahsaz Konstrakshn», «ABK Avtodor NS», «Qazjolqurylys», «Aqjol» syndy kompanııalar júrgizýde. Al Ertis ózeniniń ústinen ótetin kópir kesheniniń tapsyrys berýshisi «Qazavtojol» ulttyq kompanııasy, qurylysty «Qazjolqurylys» JShS júrgizýde. Jalpy, qurylys basynda barlyǵy 115 kompanııa jumys isteýde. Olardyń jartysy jol salýmen aınalyssa, qalǵandary qurylysshylarǵa qyzmet kórsetýde. Osynyń ar­qasynda jergilikti 3 myń adam jumyspen qamtylyp otyr. Jumystar qys mezgilinde de jalǵasa beredi. Jol sapasy eýropalyq talapqa saı. Kópirler arasyn 9,1 shaqyrym avtojol jalǵap turmaq. «Ortalyq-Shyǵys» avtojol dáliziniń birqatar bóligi eýropalyq tehnologııamen salynýda. Al jalpy avtoban 2017 jyly salynyp bitpek. Keń jolaqty avtobannyń 12 shaqyrymy sý ústindegi kópirmen ótedi. Qurylys jumystaryn júrgizetin merdiger kompanııa ókilderiniń aıtýynsha, avtoban jıegine jasyl jelek otyrǵyzý da josparlanǵan. Bul alyp kópir jobasynyń júzege asyrylýy óndiristi oblysta «Biryńǵaı Pavlodar-Aqsý aglomerasııasyn» qurýǵa múmkindik beredi. Aqsý qalasynyń damýyna áser etedi. Aqsýlyqtar 30 shaqyrymdyq aralyqtan jańa kópir arqyly oblys ortalyǵyna jyldam jete alady deıdi. О́ńirge osylaısha jańa tehnolgııa, jańa­shyldyqtar, órkenıet talaptary kele bastady. Elimiz damý jolyn­da. Farıda BYQAI, «Egemen Qazaqstan». Pavlodar oblysy. Sýretti túsirgen Valerıı Býgaev.