«Barys» jańa jyldyń alǵashqy oıynynda jeńiske jetti

ASTANA. 3 qańtar. Búgin «Barys» komandasy Qurlyqtyq hokkeı lıgasy sheńberinde Hanty-Mansııskiniń «Iýgrasymen» synǵa tústi. Astanada ótken kezdesýde aıdyn ıeleri oıyn sońyndaǵy býllıt arqyly 3:2 esebimen jeńiske jetti. Bul týraly egemen.kz tilshisi habarlady. Match qonaqtardyń belsendiligimen bastaldy. Bar bolǵany úshinshi mınýtta oıyn taıaǵyn joǵary kótergeni úshin «Barys» hokkkeıshisi Konstantın Romanov aıdynnan qýyldy. О́zderine berilgen múmkindikti utymdy paıdalanǵan reseılikter 4-mınýtta Denıs Gorbýnovtyń kómegimen esep ashty. Alaıda, olar bul basymdyqty bir jarym mınýt qana ustap tura aldy. Atap aıtqanda, 5-mınýt túgesiler tusta «Barystyń» qorǵaýshysy Maık Landın mergendigimen kózge túsip, tarazy basyn teńestirdi. Ekinshi kezeńniń basynda, ıaǵnı, 26-mınýtta «Iýgra» taǵy da alǵa shyqty. Bul joly gol Evgenıı Orlovtyń enshisine jazyldy. Úziliske deıin qansha shabýyldasa da Andreı Nazarovtyń shákirtteri qarsylastarynyń qaqpasynan sańylaý taba almady. Abyroı bolǵanda, sońǵy bólikte, ıaǵnı, oıynnyń 56-mınýtynda Dastın Boıd nátıjeli soqqy jasap, komandamyzdy jeńilisten qutqaryp qaldy. Overtaımda bir-biriniń osal jerin taba almaǵan komandalar oıyn sońyndaǵy býllıtke júgindi. Bul synda «Barystyń» joly bolyp, maýsymdaǵy 22-jeńisine qol jetkizdi. Búginde elordalyq jasaq 66 upaımen Shyǵys konferensııasynda 7-orynda keledi. Bizdiń komanda kelesi kezdesýin 5 qańtar kúni óz aıdynynda Ekaterınbýrgtiń «Avtomobılısimen» ótkizedi. Elaman Qońyr. Derek: egemen.kz. Sýret: hcbarys.kz.