Aqtóbede Altaı batyrǵa arnalǵan konferensııa ótkizildi

AQTО́BE. 19 qańtar. Aqtóbe qalasyndaǵy S.Báıishev atyndaǵy ámbebap-ǵylymı kitaphanada Táýelsizdiktiń 25 jyldyǵyna oraı «Azattyqty ańsaǵan Altaı batyr» atty ólke tarıhynyń ózekti máselelerin qamtyǵan ǵylymı-tanymdyq konferensııa uıymdastyryldy. Bul týraly egemen.kz tilshisi habarlady. Kitaphana foıesinde Altaı batyrdyń ómir jolyn alǵash zerttep, ony Almaty, Máskeý, Orynbor muraǵattarynan tapqan derekterimen ǵylymı negizdep jazǵan tarıhshy, tarıh ǵylymdarynyń kandıdaty, marqum Berkin Qurmanbekovtiń «Altaı batyr» atty kitaby kórmege qoıyldy. Konferensııaǵa tarıhshy ǵalymdar, Q.Jubanov atyndaǵy Aqtóbe óńirlik memlekettik ýnıversıtetiniń oqytýshylary, Baıǵanın aýdanynyń ardagerleri men mektep muǵalimderi, qalamyzdaǵy arnaýly orta, joǵary oqý oryndarynyń oqýshylary men stýdentteri qatysty. Sharaǵa qatysýshylar ǵalym, ólketanýshy Berkin Qurmanbekovtiń eńbek joly týraly «Tarıhtan taǵylym tanytqan tulǵa» atty kitap kórmesin tamashalady. Kópshilik nazaryna Altaı batyrǵa arnalǵan foto-slaıd usynyldy. Q.Jubanov atyndaǵy óńirlik memlekettik ýnıversıtetiniń professory, tarıh ǵylymdarynyń doktory, professor N.Abdollaev óz baıandamasynda ólketanýshy ǵalym Berkin Qurmanbekovtiń tereń mazmundy, ǵylymı deregi mol «Altaı batyr» monografııasynyń qundylyǵy jaıynda, Ábilqaıyr hannyń serigi bolǵan Altaı batyr Ebeskiulynyń iri tarıhı tulǵa, talantty áskerı qolbasshy bolýymen qatar oıshyl, qara qyldy qaq jarǵan bı bolǵany jaıly áńgimeledi. Baıǵanın aýdandyq ardagerler uıymynyń tóraǵasy, ólketanýshy I.Ermekbaev Altaı batyrdyń jerlengen jerine qatysty óz pikirin aıtty. Baıǵanın óńirindegi Terisaqqan ózeniniń boıyndaǵy «Altaı qorymynyń» foto-slaıdyn kópshilik nazaryna usyndy. Basqa da shyǵyp sóıleýshiler Altaı batyrǵa qatysty oı-pikirlerin ortaǵa saldy. Satybaldy Sáýirbaı. Derek, sýret: egemen.kz.