Qazaqstan konfederasııasy «altyn áriptes» atandy

ASTANA. 20 qańtar. Sporttyq jekpe-jek jáne kúsh qoldanalatyn sport túrleri konfederasııasy úshinshi jyl qatarynan SportAccord halyqaralyq konvensııasynyń «altyn áriptesi» atandy. Bul týraly egemen.kz tilshisi habarlady. Konfederasııanyń halyqaralyq baılanystar jónindegi úılestirýshisi Álimjan Aqaev Shveısarııada «altyn áriptestikti» rastaıtyn qujatty SportAccord konvensııasynyń basshylyǵyna tabys etti. Bıyl SportAccord halyqaralyq konvensııasy 17-22 sáýir kúnderi Shveısarııanyń Lozanna qalasynda ótedi. Onyń jumysyna jer-júziniń 100-den astam halyqaralyq sport qaýymdastyqtary men federasııalary, sport uıymdary qatysady. Osy basqosýda kórme de ótedi. Onyń bir buryshynda Sporttyq jekpe-jek jáne kúsh qoldanalatyn sport túrleri konfederasııasy elimiz týraly kórmesi uıymdastyrady. Kórmege «QazMunaıGaz» AQ ulttyq kompanııasy demeýshilik jasaıdy. SportAccord halyqaralyq konvensııasy 1967 jyldyń 21 sáýir kúni qurylǵan. Ol Olımpıada baǵdarlamasyna kiretin jáne kirmeıtin sport túrlerinen halyqaralyq federasııalardyń basyn biriktiredi. Konvensııanyń prezıdenti – Franchesko Rıchchı-Bıttı. Ol 2015 jyly qaıta saılanǵan. Sonymen birge ol Halyqaralyq jazǵy olımpııalyq sport túrelri federasııasynyń qaýymdastyǵyn basqarady. Dastan Kenjalın. Derek, sýret: Sporttyq jekpe-jek jáne kúsh qoldanalatyn sport túrleri konfederasııasy.