Bolıvııada Zıka bezgegin juqtyrǵan adam tabyldy

ASTANA. 20 qańtar. Bolıvııanyń Portachýelo qalashyǵynda Zıka bezgegin juqtyrǵan alǵashqy adam tabyldy. Bul týraly TASS aqparat agenttigine silteme jasaǵan egemen.kz tilshisi habarlady. Bul aýrýǵa júktiliktiń segizinshi aı merzimindegi áıel shaldyqqan. Qazir naýqas Santa-Krýs qalasyndaǵy bilikti dárigerlerdiń baqylaýynda. Bolıvııanyń epıdemııalyq ortalyǵynyń basshysy Rodolfo Rokobado qursaqta jatqan náresteniń qaýipti aýrýdan din aman ekenin málimdedi. Onyń aıtýynsha, bezgek jatyr ishindegi balanyń alǵashqy úsh aıyna deıin zııanyn tıgizedi. Zıka bezgegi júkti áıelder úshin asa qaýipti. Qaterli indetke shaldyqqan bolashaq anadan mıkrosefalııa aýrýyna shaldyqqan náreste dúnıege kelýi múmkin. Ol óz kezeginde balanyń bas súıegi mólsherinen tys kishireıip, mı qurylysynyń damýyna zııanyn tıgizedi. Bir ǵana Brazılııada mıkrosefalııamen ótken jyly 3500-ge jýyq náreste dúnıege kelgen. Bul kórsetkish 2014 jylmen salystyrǵanda 20 esege kóp. Aıta keteıik, ótken aptada AQSh mamandary atalǵan bezgektiń Ońtústik jáne Ortalyq Amerıkada ornalasqan 14 memleketke taraǵanyn habarlaǵan. Olardyń aıtýynsha, ásirese Brazılııa, Kolýmbııa, Venesýela jáne Meksıka elderi zardap shegýde. Zıka bezgegi alǵash ret 1947 jyly Ýganda memleketinde paıda boldy. Osydan soń tek Afrıka elderine ǵana taraǵan. Aýrýdy alǵashqy kezeńinde anyqtap bilý múmkin emes. Sebebi, belgileri ashyq túrde bilinbeıdi. Dene qyzýy azdap kóterilip, bas aýrýy, býyn jáne bel aýrýlary, sharshaý belgileri paıda bolady. Al aýrýdyń taraýyna negizinen Aedes aegypti túrindegi masalar sebepshi bolady. Aıan Ábdýálı. Derek: TASS. Sýret: livemint.com.