Ońdy sheshim qoldaý tabýy tıis

Keshe Astanada Qazaqstan Kommý­nıstik halyq partııasynyń (QKHP) ókilderi arnaıy baspasóz máslıhatyn ótkizdi. Oǵan 5-shi shaqyrylymdaǵy Parlament Májilisi «Halyq kommýnısteri» fraksııasynyń basshysy, QKHP jetekshisi Vladıslav Kosarev, partııa hatshysy Tursyn Syzdyqov, uıym músheleri Galına Baımahanova men Vıktor Smırnov qatysty. Birinshi kezekte sóz alǵan Vladıslav Kosarev elimizde Parlament Májilisi saılaýyn kezekten tys ótkizý jónindegi bastamanyń oryndy kóterilgenine, onyń el damýyna tyń serpin beretinine toqtaldy. «Bizder, qazaqstandyq kommýnıster Elbasy Nursultan Nazarbaevtyń Parlament Májilisin taratý týraly sheshimin biraýyzdan qoldap-qýattaımyz. О́ıtkeni, qazirgi tańda álemde adamzatty tolǵandyrǵan máseleler kóbeıip ketti. Ásirese, ekonomıkalyq daǵdarys, ártúrli saıası kıkiljińder ıektep aldy. Elimizde ótetin saılaý halyqqa, barlyq saılaýshylarǵa, qoǵamdyq kúshterge, saıası partııalarǵa búgingi jaǵdaıda elimizdiń ómiri men qyzmetine, múmkindikterine taldaý jasaýǵa jáne Memleket basshysynyń bıylǵy Joldaýynan týyndaıtyn maqsat-mindetterimizdi anyqtaýǵa jol ashady. Osy jyldary Qazaqstan kommýnısteri, partııamyzdyń Májilistegi fraksııasy belsendi jumys istep, elimizdiń qarapaıym turǵyndarynyń muń-muqtajyn aıtyp, múddesin qorǵaı biletin uıym ekenin kórsete bildi», – dedi V.Kosarev. Spıkerdiń sózine qaraǵanda, partııa 2004 jyldan beri barlyq prezıdenttik jáne parlamenttik saılaýlarǵa qatysyp, óziniń saıa­sı belsendi kúsh ekenin tanyta alǵan. Onyń aıtýynsha, 2012 jylǵy parlamenttik saılaýda partııa 7,19 paıyz daýys jınaǵan, ıaǵnı barlyq saılaýshylardyń 500 myńy QKHP úshin daýys bergen. QKHP Ortalyq komıtetiniń hatshysy Turǵyn Syzdyqov ta óz partııalastary Prezıdenttiń Parlament Májilisi saı­laýyn merziminen buryn ótkizý týraly Jarlyǵyn qoldaıtynyn jetkize kelip, sońǵy kezderi elimizde atqarylyp jatqan ıgi sharalarǵa nazar aýdardy. «Biz Parlament Májilisi depýtattarynyń úndeýin durys bastama retinde qabyldadyq. Sondyqtan, Prezıdenttiń Parlament Májilisi saılaýyn merziminen buryn ótkizý týraly Jarlyǵyn biraýyzdan qoldap otyrmyz. Qazirgi tańda ekonomıkalyq daǵdarysqa qarsy kúreste elimizdiń shıryǵa túsýi úshin tıisti josparlar qabyldanyp, aýqymdy sharalar qolǵa alynýda. Máselen, Nursultan Nazarbaevtyń bıylǵy Joldaýy, «Nurly Jol» baǵdarlamasy, «100 naqty qadam» Ult Jospary sııaqty kóptegen baǵdarlamalar elimizdiń daǵdarysty eńserýine mol múmkindik beredi. Biz osynaý baǵdarlamalardy jańa, tyń kúshpen júzege asyrýymyz kerek. Ol úshin birlik, yntymaq kerek», – dedi Turǵyn Syzdyqov. Sondaı-aq, Qazaqstan Kommýnıstik halyq partııasy Ortalyq komıtetiniń hatshysy elimizdiń ishki máselesin eshkim kelip sheship bermeıtinin aıta kelip, Elbasy saıasatynyń arqasynda memleketimizde Jalpyǵa Ortaq Eńbek Qoǵamy qurylǵanyn, onyń QKHP baǵdarlamasyna sáıkes keletinin atap ótti. Jıynda sóz alǵan 5-shi shaqyrylymdaǵy Parlament Májilisindegi «Halyq kommýnısteri» fraksııasynyń múshesi Galına Baımahanova da óz áriptesteriniń sózderin qoldaı otyryp, saılaýǵa qatysty shyqqan Elbasy Jarlyǵynyń mán-mańyzy jóninde áńgimelep berdi. Joldybaı BAZAR, «Egemen Qazaqstan».